Immut unaruz ?

Deln igenwan s imedla n tguḍi
Tels tafukt timelsit n tkerẓi
Nteln-t tifawin gh tillas n tserfin
Ttuykrafen izenẓaren, lan tigusin
Ar suddumn imeqa n umeṭṭa, gan imedwan
Ar gis-en ssan iẓuran n w-addag irufan
Ar salsan-t titbirin tigellinin
Ḍufen-t ukan tiferḍt n tgaywarin…

Tag°mert tamazuẓt n tumert

Tgit-en aḍar, gegh-en aḍar
Righ ad dim drugh abrid n tudert
Izemuẓẓal nem ar tighzifen, ar tiḍnin d ar tdusen
Winew ar tigzulen, ar tisdiden d ar tamumen
Tssunfet iy zegh tmssektit nem, tettut iy
Tssukeft iy zegh tkuyasst nem, tessak°it iy
Tmunt d wiyaḍ, tget asen timelsa d imessa
Tssisfiwt asen aḍan, tessanfet asen iḍersan…

Anir

Ilul-d w-Anir zund tafukt gh igenwan
Yiwi-d anaruz, tumert d w-awal ighudan
Issus izenẓaren f taddart n baba-s d ma-s
Tels tudert nsen tadawit
Issutel as ufulki
Tg°del-tt tirghi n tayri
Anir, iga tafukt ar as tsutulen imedla…

1 2