Mklli t tsml g ulghu lli tsizzl i ugdud n masst ula win bṛṛa, tskr tmsmunt afrak yat tsutlt n usmuttg f tutlayt d usslmd n tmazight g uzddugh nns gh masst ass n 04 d 05 bṛayr 2010, ittuẓlayn i islmadn d imzrawn d willi tt yiwin g tutlayt tamazight. Macc idrus ma iḥaḍrn g islmad (ur nssin maxx) slawan akk^w willi isaqran d willi ra isaqqra tamazight g usslmd amnzu, mqqar ar bdda tsmummuy tugt gisn f imukrisn lli darsn illan g usslmd d ussghr n tmazight (tifinagh, didaktik, tajṛṛumt, amawal…).

Mqqar d ghikann, imadrutn lli yamun g unmuqqar ad n usmuttg, slawan akk^w imzrawn n usaka n tghuriwin timazighin n tsdawit n ugadir, iwin nn tayafut mqqurn, fk tayafut ula nttnin, sattuyn aswir n umyanna d tussna f tutlayt tamazight, acku nttnin ad igan imal n usslmd d ubughlu n tmazight g kraygat asays d tmssdusin n tawunkt tamghribit (tinml, asmal, taghdmt, taghmsa, …), mqqar asn ur ttufka tawit g tmldiwin n uswwuri d unnurẓm n tflwin n twwuri.

Tasutlt ad, lli f cayfn islmadn Hassan Burkoa, obdsslam Bumiṣr d Lorbi Mumuc,  tbḍa f mnnaw igumn (axes) zund ag^wmmay nghd askkil n tfinagh, asnmarra (orthographe), tajṛṛumt, tasnayt (tasddast/syntaxe) d tdidaktikt n usslmd n tmazight.

Dat ad ssntint tsawurin, tlla zwar, g tifawt n wass amzwaru, yan usurs f waddad n usslmd n tmazight d imukrisn nns. Mdiwln gis imadrutn d isalmadn f mnnaw imukrisn d id bayṭṭar n tmazight g tinml n lmghrib, tanamurt ula tusligt : amukris n ussinf n usiṭṭn n tutlayt tamazight g lbiltan, asmmaql andram-adamsan d win iṣaḥatn lli illan dar kran id babatns d imarawn n inalmadn, azzmẓiy n watig n tmazight, asyafa n tḥggart n ixfwan nnsn, amukris adlsan, asrtan d asikulujiy lli illan dar imghrabiyn slwan akk^w islmadn n tmazight lli izzmẓiyn atig d tawwuri n usslmd  n tmazight lli fllasn illan ad tt skrn, ar rẓẓan tayri qquṛn d tirit mqquṛn lli s ran inlmadn ad aqqran tamazight, tamasayt n tmawast n usgmi d usmuttg d tmssdusin lli as iwalan, ig amdya igg^wran aylli mi ittḥiyyal Usqqamu unnig n usslmd.

Amdiwl ad d umyanna iffagh s yan mnnaw isumurn zund : ad usiẓliy (taxaṣṣuṣ) dar uslmad n usslmd amnzu, ad tskr tmssdust tamasayt (nniyaba d tmawast) ismuttgn ddutnin, ad ismuttg uslmad ixf nns s ixf nns, ad mmaghnt tmsmunin, iḍfurnt tawwuri n usslmd n tmazight, awsnt ula nttnti, ad tettufka twwuri n usslmd n tmazight i willi tt sawalnin d willi gis skrnin asmuttg slawan akk^w imzrawn lli d iffaghn g isakatn n tughuriwin n tmazight g tsdawiyin n lmghrib.

Anqqis : Larbi Mumuc

Tamsmunt Afrak Masst