Ikka tt inn dawkan tlkkm tizi lli,  ar itthbu gh wafud issan n immis tamqrant ; talli yas issmyarn umiyyn fulkinin f wakud ann yaggugn ittghzan g umzruy . tiguriwin ngaddanin ad d ittnsmadn gh imi mi ttkwlan wancucn s idrfan n isggwasn ,  imi da mi d ssusn yirn uxsan abla yan wangwlla ,  imi imdin tudrt n wussan iskr gitsn izlan ,  alln n immis tamqrant drant nn ar d ssaggant tamurrant n wallasn n tallasin.

Yan was gh ussan smmidnin gh tizi n unttar n tafukt,  imdla isggann ad ittmunn gh ignwan,  ur ta mmtghin s indr yiggig utn usman da ittksn izri . aylli tmyar tussart askkiws gh tghzut n uhanu da gh smann tinwi ula taguni ,  arraw n warraw nns ar issrgha ngr ighmran nns, tkti ussan imzwura gh tudrt nns, tuda iss tmktit s kigan;ussan n tmzki, ar tn inn tssmkiz s taqqayt n tgrzawt d tnddimt n uzzrray nnsn, tnna ar tsmuqqul gh mimmis:

« …nkka tt inn igh ggutn ikrramn arizn ignwan ilin ijawwan, ar nttmun nkkni n wazzann nskr tagdudt f lfngrt n takat,  gh tassqqift gh usuk ann iwalan timzgida, ar nswirriy awal ar t nkkat kiwan iluh d s umaynu n iwnnan d aynna dars illan n umiyyn,  « ..iiih..!izmaz fulkinin ! »,  tadsa ar tsufu udmawn nnagh, tagmatt d tayri aygan asnay n igiwr,  ur tssn tgndawt ula tanwwact abrid s wulawn.

yiwis n warraw g tizi d tayyad ar isaqqsa  s tnnawt,  walaynni mas tamqrant yat tklit trara as yat yadnin tnxxlt, tsul d nttat gh wallas nns:

« …akud nna gan ikccudn ighd nennffnzwi ku yan s tgmmi nnsn, asr ann, aylli zzwurgh ix kcmgh s taddart ar nn lkkmgh immi ttrgh gis ma s nqqagh lazz, g ma gh tettgh ma yi tfka ar nn ttargh g ubaws nns issan f ifaddn ddmgh g yan ids iglugln s twwargiwin,  ur ar d gis ttduygh abla taylgi n usska s zaza n igdad lli ttilinin gh taddagt n lluz lli itkarn s izqqran nns asarag n nnagh ».

Tawssart lah as isqqsitn tkn d agayyu nns tunni agzzum n tasa n tasa nns ingd gh twwargiwin tasit tskr iss asguni nns , tmmsifid dids s yat tsudnt irghan gh ammas n tgnzit nns, usar issn gh ussan a nn d yuckan afud issan, wad as isasstwan tiwwargiwin ittwarga ku igh issfld i wallas f tfsut,  d igdad,  d wafatn,  d waman ula afgan; d uflla n aya asnuhnnu n tussart ilan tadfi s wanawn n tmdyazt d tmawact.

Iduy d warba s iklli ur imyar,  lah l3yad n igdad awd ma isawaln ur illi,  tagmammut gh udghar ,  udmawn n ayt uxam llxmumin s imttawn!, ismaqql tafasiyt ula tazlmadt,  immati tasga ad ula xtta nn ar ittlli s udm n immis  tamqqrant ikks gis yat tghuyyit:

“immi jjaaa..! »… »immi jjaaa..! »

taghlaghal nns rirn iss isuliln,  ur ta tt ibbi tmgrt innas s ighalln nns tssfzgt s umtta, tskwrkwc as nn gh umzzugh:

« ..tmmut!..tiddad n rrhmt n rbbi fllas », mrrksn as iwaliwn d tshattayt: »…immi jja…imm ijja..! ».