…Ghika  ad iga, tamyawast nns aswingm ad igan tawwuri nns, mta ka isnfl g ma x iswingim s yan imikk idrusn; ar t tzrrat yawi ak d unlli is iga win ixf nns, is t tssusm tudrt nns, maca wahli!..wahli!.. is tsnd mad ittwirriyn  g ugayyu nns?, yugr unck ann!, innckl akkw. llant tikkal ar gisnt ittdr tudrt ighudan:
….tihirit ifulkin..tugtt n idrimn gh lbanka..argaz ilan atig.. ilulluyn gh tmdinin mqqurnin  g  umadal.. aya d kra yadnin ar ittnzillif gh  uttayfur nns g yat tusdidt, ur jjun iswangm kra n  tizi mani gh rad  yawi ma as isgaln abrwingmn  nns?
kullu aya nn ur t id issduy, nttan d uslhssu nns ddrn g izmaz fulkinin, ar as d ttackan ichiwicn a ku taylgit igh  iduy  g ids, ar nn ittghama gh uwingm nns iddm g tudrt  idxxmn… maxx kullu ma ad?, ma as d yiwin aswingm a?, sul  mad  sar ur ilkm! .   rad inigh yiwi as  t id wanaw n tudrt nns, iddr yat irxan  ar d gis ittawi ma ittet ku ass..inigh yiwi as t id kramraw n usgwas da dars illan g uwtay, aya nn as isslghayn tudrt ann yaggugn..inigh dagh yiwi as t id idir nns g kra n tghawsiwin  as ganin  anffir ar ka sul ittghawal imdla…
dufaght yan wass ad nn aghagh ifrwan n ugwns nns issangh mad gant twwuriwin nns izbu yi nn aya nn aylligh urrigh zund amalu nns, da dids ttmungh ku igh fllas tlla tafukt ar kigh twl,  ur nn tamgh a llig nn ukzagh agayyu inu ttutagh s aylli s ittut!..ayyay!..iga aya nn  yat  tiyyti  lli inddedn, ur sul  asstwagh  ttyawslaygh, ar ttiligh  g imaglaln  n iggi n wakal, g ma gh  ur twwari titt s d ssutlgh i tmizar nn aggugnin, mmarrigh g igadazn ixatarn tyawssannin g umadal, ar snxilifx mad ihyan  g tghawsiwin, afgan  yadnin ad gigh ar skargh kra s yi tnna talganat inu, d ar nn tnalgh yan  yi d igan  afus, salagh d tmallayt , lutilat id bu itran sugrnin a gh ggangh….
ktigh  yan wass ar ttawngh g iswak mqqurnin n lundr da  fttugh s yi ssanint twallin  s aylli s ar agh ssiniynt nkkni n iwtman..mad awa zrygh? ..ayyay!..a yan udm!..ifulki..ar ka isufu..imi izmummgn d tiddi inmalan..timitar n tutmt ann ar yi sshnatnt ad s tt n lkmgh,  mmaghagh ad awigh asmmaqql nns aylligh rmigh, ur d zdmgh yat skrgh aylli mi badgh… hu tt twats lutil lli gh nit  ggzagh,  tatagh yan wasr zmlalagh nn mad isarn, talli tga ukan yat tacckart tamjahdiyt gh ufus;tamssnbagt g uzdagh ann tssnbg tt, lligh kullu tsmd iskkirn n uzmam n tmagit nns, tzwur as s iskwfal ttawinin s uhanu lligh rad tns,  tskkalgh nn, inmuqqur yi d umazzal axatar n lutil acku gigan ad nkka nttyawssan isbrrk yi nggawr gh yat tghmrt n inbgiwn illi g tssunfun ar gis tettn aynna ran,  yan imikk turri  tmawwast lli tsastwa nn udm da yi yutn s ufdaddu irghan, utgh as nn s ufus tlkm yi d saqqsagh tt gh mm ufulki lli, tsmaqql giti nnk ula walli fllas illan , tzmummg tini yi d s yan wawal n tayyayt : ..mamnk, is ur  ttakzd ayt tmazirt nnun?!..nnghrigh akkw g idis inu inigh as: mad a ta ttinit?, tzmummg nit tsnuccg agayyu nns is iga aya nn tiddt ar tfttu, za nkkin  utxas s ugayyu d ufus s tnmmirt nns,  smaqqlgh gh walli n tama inu iskna yi titt nns, dfrgh inigh as s yat talgha d ikkan jaj: tga tt?, irar yi d f wawal inu s igmz izzgan, imsafad diti ilkm tawwuri nns, ghamagh  ar jddrgh s twingmt  ggh nn afus s yan lkas n waman illa xf iggi n tdabut sugh t s yat tikklt igh ittyaf ad nn issxsi afdaddu n tummrt n ugwns inu,  ttyawfka yi tnwult n wurgh  nn ur tamgh rad biskgh ad amzagh aylli s tlligh ur d mad idrusn!, ghamagh d ghikann s d ukan innurzm ssansur tffgh  gis tls d ihdumn yadnin,  bbrgh nn gis izri inu akzgh nn timitar n darngh,  udm ann ar yi d issktay kra izri gam  ngr walln inu,  ..ar swingimgh ssumgh aylli d yagurn n waman g ughrraf lli,  imzgan inu duyn d s yan ugrd immimn allgh alln inu s aflla zrgh ma ibiddn g tama inu, ad inigh anglus!, nnigh as s wawal ihnnan .. »HeLLO »..ttrgh gis ad tskkus nmmsawal s tngliziyt ig wawal nns amzwaru: »is giti tsaqqsat?, rargh as ma s iga aya nn tiddt, s as tetrm yat tmttiwt i wmadl nns digh d yat tfrt tumlilt ilgwaghn gh lfista inu fkgh as tt, unck ann isndudi  jaj inu inigh as : »mad am d yiwin allig trrut! », ur nn tamgh ad yi d trar s yan wawal ittgwnan,  immrksn s tguriwin am tilli  lbigh ….tiguriwin n tmazight innckln d tutlayin yadnin, ..yah!,  tghzan tmawwast lli!, illis n tmazirt inu a ad, tsmd  f wawal nns ar ttals f uzwag n tawja nns gh tmizar n irumiyn d tuggugt f usun lligh tlul, fssagh ar ssflidgh…yyih illis n ayt darngh… willi zugnin zikk g ussan n umdduruy, ur as mligh adghar n tzddught gh umur nnagh, saqqsagh tt mani g tlla ghila tini yi bariz, smdgh f isqqsitn inu:mad za tskart g ghid?, tini d ma s txs ad tsmd tighri nns yattuyn,  sfukksgh as s imnsi tiri;iga wassagh nns tunaruz… ayhayya!tga ma gh tt ittawi yan?, ittrs agh d imnsi ar nswirriy iggitn n wawal, nengara ku yan iftu s tmsriyt lli g rad ins, bhra nn zzlgh g tisi s d flli tlla tilifun n tzdght nnan yi ha massa tunaruz tettr ad srk tsawl, inigh asn  zzri a t s tt id, tkti asqqsi f tmazirt inu!, d mani d kkigh s lundr?, lli gh nskkus ur as tskr tmktit srs izlin ad yi tsaqqsa,  ssinfgh as awal inigh as taylgi n uskka nsmd f iwnnan..,   duygh d s sa ighuran n bigbin, agwgh  g usrjm, agusif n ighrm ad bu imdla ar issmyur, mzigrgh skrgh arabad ssirdgh gis, ma g d ttffughagh s inn yucka wutci tettgh t, nkrgh ar lssagh ihdumn inu,  ttnurzumgh taggurt n uhanu ad ffghagh s  nmaggargh d tunaruz tuts yi nn ,  nmmsuzl nmmsnigiri azmummg, tggal ard nn iligh g tinawt lli rad tfsr g usinag n tutlayin n iwdan n umadal g taqqra, ur ghuri amr ad irigh, nssudu yat thirit tamzzyant ar nttmsawal g ugnsu nns, s tt akkw sndudigh lligh as ssulghtgh is ssngh babas tsul tiyyses llig tssn is yan g tarwa usun ad gigh, tzwur yi s udm n rbbi ard yi tnkd i twacunt nns bac ad dids myassangh, ttrgh gis ad tssanf aya nn ar azmz nnidn,  walaynni kwnigh d sul s uzazu n tirit nns, g yan imikk nlkm tasmlt nnagh, nwdf s usinag tssnkd yi i wslmad nns,  nmmsldi kra n iwaliwn gzzulnin, s d ittr yan ugrd g ugdud ad kcmn s udghar n tinawt, udfgh ghilli ar ttnuruzh ad tssusm tinawt n tunaruz imassann da ghinn illan…aylli sutmgh ad ittwaskarn ulghagh tt bahra acku tinawt nns tsawl gis xf wawal n tmazirt nns s ils angliziy;llig tsmd tawwuri nns ur tnbd g agayyu nns tumz gh umuddu s bariz, tra ad tmun d inghmisn n tmazirt,  nwats azagz nssudu tasaylalt ittawin s fransa, g yan wasr s nn nufa iguyya nnagh g bariz, isul ufulki nns ar isufu llig  ar nn tsawal s babas ad agh d inmuggur g imi n uzagz, ar tt id isaqqsa gh tmsirt ur tri ad as tt n tml tra ad as tg tann ur itam, nikkin bddgh g tama nns ar ttqqlgh ad tsmd awal nns s id nit iggr yan ufus g tghrudt warrigh ad zrgh mad ira ghalgh is kra n yan ad ijlan ira ad isaqqsa, duygh d f udm n yan umddakkwl inu ikka yi nn ukan darat issduy yi g twwargiwin inu, irwas is t inded ghaylli yi yaghn!.