Ussan a ttigatn iwaliwn xf usslmd,acku imun fllas umnad is iga yat trstlt tasilant n uduyd yuman i ku amatu g umadal ;ghmk a nn af nttafa imsiggiln g igran n tmussanin n ussgmi ur bbin ,hma ad afin kra n manik iziln lli s irxa ad srs ittlmad unlmad g tinml.ikka tt in uslmad,g umnad n ayt ussgmi azayku, nntan ad igan bu tussna(savoir) igh d dars ur tkki ur tt yufi unlmad walli s ghaln is iga yat tasna imlluln,taghawsa nna gis ur tzzugzt ur tt ittissan,amnad ad ssurdn fllas ifassn ur sul ighama,tili dagh tmagunt n tinml tanklant yattan tawssna xf icumma,d ar ttini igh ur illi ulqqid ur nttaf tamrarut,tamsirt s tgharast n tinml ad ar ttwaskar s ubttu n tussna f iwttasn mzziynin,amnad ad frnn t kigan d imussnawn am piaget d wiyyad lli ttannaynin s tzmmar n unlmad d ur ittyaf ad ittbdu uwrik n umhdar f id bbi ;tigwra a nssflid i imggrad n imusnawn n iman ttalnin i ighuran nnsn ma s ittxs as tt nttawi gh unlamd n issan is ghurs tizmmar d tsugar mas ittlmad tighawsiwin,iwrri uslmad ig amyawas d umsslday n tussna,anlmad ig amnrur n ulmmud d usslmd ;ighuran a ar ttinin is tussna(savoir) ar ttuska s ufssay n usurs amkras(situation probléme) minzi anlmad igh ismrs isugam (ressourses) nns{tussna(savoir)-tussna n tiggit(savoir-faire)-tusna n tigit(savoir-être)}xf ufssay n kra n umxumbar as izddln swa iga winns,nigh win ufgan,nigh win tmnadt,tayafut n ufssay a nn ad igan aghudu n ulmmud,ur d igh as zwar nfka kra n ulqqid ar n ttqql ad agh d irar.
G umgrad a rad awigh yan usmmaqql f manik tzray tmsirt n tutlayt tamazight g tinml s tgharast n isursn,tagharast a lli bahra yakkan atig i ufars n unlmad ;ar ssitimgh ad nn gis yaf ku aslmad n tmazight yan usafu as ittawsn g twwuri nns,d ar gisn ttetrgh ad yid sngaddan inna d ur ccuckigh.
Gh umzwaru rad fkgh kra n inumak n kra n talghiwin lli rad smrsgh :
• Asurs :yat trabbut innkwcmn n tghawsiwin :ar tmmal azday ngr tafgga d kra n usatal, nigh kra n tmsirt isarn g tudrt zund : ammuddu s ugadaz,tafugla…
• Amukris/amxumbar/allatn :kra n ummrwi lli izdlln i wnlmad.
• Asurs amkras : tagrumma n tmassanin ttyawfsarnin g yan usatal,hma ad ttyawsmrasnt s yat tgharast tandwaft gh dar unlmad,bac ad iskr yat tmskirt mi ur issn afssay tugha.
Igh nskr yan usmmaqql g idllisn ttyawssghranin g tinml tamnzut da nttafa tangiwin n tutlayt tamazight gant : amsawad-tighri-tirra-aswurri n tutlayt(tajrrumt d usfti)-urar-afars n tirra.tilal a ar tnt nzzray s tgharast n usslmd s isusrn,ur rad ttugh is ghurngh mnnaw isursn :asurs amkras,asurs awttas(situation cible),asurs n usidf(situation d’intégration),asurs amszugl d wad uddis ;mmrwasn ur nnzin abla g wakud tn nskard uwttas f tn nskar,amkrus ar t nzzwur hma ad isku unlmad timassanin wiyyad ar iss nttadz timassanin bac ad n fk tugga i wnlmad is dars uttuf amadrus nigh amuzzur n tsugar.
Tifrkiwin s izray usurs :

1. Tayaduzt xf tussna n unlmad: Isqqsitn iskktayn timassanin zrinin,asmmsti n twila n twwuri(tawwuri tamdant,tawwuri tamagrawt),Akttay n ilgamn d usufgh n ilughma da ilan azday d tmsirt tamaynut.
2. Tilal n usmuttg d ikiz n usntl xf tlla tmsirt :Asnkd n usurs,assfru n tguriwin qqshanin,tawsa xf urmas n tmlmadin,asmmsti n twila n twwuri(tawwuri tamdant,tawwuri tamagrawt),Izrra unlmad asurs isnighs t,tikkit n turdawin,asnubbc xf isfkiwn hma ad tn yaray issfsi tn,isni tn bac ad yaf ilgamn imaynutn nigh issn tussna tamaynut.
3. Tilal n ussanun: Ad yaws i inlmadn g twwuriw nnsn, asmmsti n twila n twwuri ad ttyawskarnt f wanaw yusan. Asufgh n ilughma,askkir n isursn.
4. Tilal n usidf: Ad yaws i inlmadn, asmmsti n twila n twwuri(tawwuri tamdant,tawwuri tamagrawt) Ad fsin isursn lli rad asn yaws ad ssudfn timassanin izdin d tgzzumt.
5. Tilal n tyaduzt d tnalit: Asmmsti n isursn yusan d isughad,azrray xf ilughma d isursn s tawsa n tratsa n uzrray,aray n tzgalin. Tawwuri tamdant,ad fsin isursn,Asufgh n ilughma n tnalit nigh ulsn i tmsirt.
    tfrkiwin a da zraynt g ku tirmt ur ar tnt nattu,d iqqan d ad inigh is ittghama umurs n kra n tmsirt xf mnnawt tghawsiw ffghnin afus n uslmad ula win unlmad gant tid zdinin d tumayt usin idllisn,tawja,asayrur n tinml,afulki n tdaliwin,awtay n inlmadn….
   G umggaru ar ttnuruzgh ad naws g usslmd n tmazight s mad idrusn ula kigan af ad nsrs kra n trsal dusnin lli rad yasi azazu n tutlayt d tghrma nnagh.
   adlsumugh f usigh :
   -amnir abidaghujiy n usslmd amnzu,tamwast n ussgmi anamur d usslmd yattuyn d usmuttg n imsugr d usiggl amassan 2008.
   -tasddiyt n tifawin a tamazight 1 ar 6.