Gw matnegh Larbi Douch Amasus, akarikatur g Umaynu d unazur izilen netta d tmttutt nes ufan-d ixfawen nsen g tkrrayt, ussan ad ur-d is ukren, nghan negh ccan ayda n kra ! is helli ran ad stin isem i w-arraw nsen « Anir Douch » (Amasus Amzyan). zun-d igh ur igi may ann azref nsen …!
Nra ad naws i gw matnegh Amasus, nall as atig lli gh ibidd d uzref nes immagh fellas… wi lli ibidden gh ubrid n Ssi Amasus d tmttutt nes, ur rad awin amer ay lli iwin wi lli ibidden g ubrid n gw matnegh Ssi Abdellah Belhoussine, Brahim Oubella, Abdellah Elbahi, Mhamed Bouhouch d wiyyad…

G tmyurin n id babatsen(t) negh id Matsen(t) n imrasen g lwibb (web) ad izli ku ssitt negh « Amaras web » negh (Site web) tighmert nna gh ar ittenyilkim d imghran nes, mqar ar akkw ttenyilkimem d umaynu s yan man mek negh wayya-d tighzi n useggwas g tudert nes, , nra ad tzli tighmert ad, ad g is nzerra mad ttinin(t) imeghran d tmeghratin n umaynu xf ay lli radd nttgga g usays ad… mek ad af nzli tikkelt izwaren yan umukris igan wa-d imquren g tmazirt negh ula timizar akkw lli g llan imazighen.. ad-t igan d umukris n n usmal (information) ig it TV, Asadrar (Radio), Aghmis (Journal), Tasghunt (Revue), negh Taghmist Tiliktrunikt (Pubilication Electronique) zund (am) Amaynu…

Zegh ass lli gh sellagh mas llan imukrisen g Tghjjijt ad nnigh d ixf inu mas rad ur ig w-awtas n imayasen (responsables) n tmazirt ann amer wi lli swwurinin g iger n izerfan n ufgan, iserfan n u ku yat d yan ad ddren g tderfit, tilelli d ad ig umdan (peuple) g tghjjijt ay lli ira, ur d ay lli y-as ran…. sellagh mas ittyamaz gw matnegh Abdellah bukfu, Habibi d wiyyad yaden nna sul illan ddu ifassen n tawunkt nna ur igin g iwtasen nes awd saha n ufgan, n umdan, n medden timgharin d irgazen, macc ass lli gh yyi-d ilkem uneghmis mas ttyamazt, ssnegh is ilkem lmxzen ay lli s ighal ist ilkem .. ad ittyimiz Bubker, d imddukkal nes, ad sul ur yili mad isawalen… ad ttun medden maf mmaghen, ma f ddren, mad gan …?

Had Amaynu ikka aseggwas s timmad nes (kullut) g lwibb (internet), may ad ur rad yad lli yili amer s tfasiwin (efforts) n tugtt nnun/nnunt, s tirra nnun(t), iswingimen nnun(t), afran (critiques) nnun(t), g tgira, asenflul nnun(t) acku asenflul ad igan awttas amezwaru lli s ira umaynu and s is yaws g iger n tussna d tdelsa tamazight.
Agharas ur issi s igwdifen n tadutt d ijeddigen zund akkw igharasen n tderfit d tlelli, tilelli ad yara yan/yat s tutlayt nes.. ghas tutlayt nes (Tamazight) tizi lli gh ibejgi yu yan is issen Tinglizt, Tafransist, Taarabt, Tasppanyunt.. d tiyyad yaden… stin imaraten d tmaratin n umaynu ad aran s tutlayt lli y-asen(t) iliqen… ta lli f mmaghen(t), ta lli y-asen(t) igan anezgum n ku y-ass, izdiren(t) ad bbin(t) acbar…

« Anu umazigh » mek lli s ar ttiyenna, yat tinmel (ecole) g tqbilt n Ayt Rxa, Tiznit… tinmel g udrar da g is aqrant tferxin d iferxan n w-asun ad (Village) ad d yuckan nger taqbilt n imjjad d ayt Rxa lli ittussanen g umzruy…
Tizi nna gh zrigh tama n tinmel ad.. ar bedda ttinigh mas radd yack yan w-ass lli gh rad as senflen isem acku ur-d…

Tlkem dagh tizi lli g w-ayur lli gh ar nsatig (evaluer) ay nna turam(t), ay lli mu nttini g « Amaynu » Top n mad turam(t),  mqar ila ku mad turam(t) ay nna ira igt atas n w-atig. ar ittall ula addur i Tmazight d tirra nes.
G w-ayur ad, ilkem umagrad (Article) lli tura Massa Aziza Nafia f udlis da d tdhi tmarat Massa Khadija Arouhal takyudt, yili may…

Ifta useggwas, ilal-d wayyad, mek lli s ar ttidu tamyurt n izmaz, iddu useggwas yackid wayyad, ar ttimghuren imzyanen, ar ttussaren imgharen (imqranen), macc azmez iga bdda wa lli, ussan wi lli, tizi ta lli, nekkwenti ti lli,  nekkwni wi lli…