Tgwmrt iyyi ka sul kmmin a taguri
ghalgh yadda ma d ndra idda ad ingiri!
lligh d yasus wamud nnm gh ukwba inu ifruri…
art ttkwfasgh gh igr n tirra… imghi nns i tghri
izbu nn waylal bu uzawan azal yan imikk iffarri!…
ssmdigh as ass ar ass timdayin… qqlgh add yurri!…
gagh am kmmi d is… nkkin amkraz amwwuri!…
tgt iyyi tudrt… tilit iyyi!… tilit dari…

Asqqul n tmghuri
igat unelli
Zrat smaqqlat insi
mqar as tmZZi tixsi
iga bab n unelli
iga sar bu tilelli
ur izmr yan ad t ighwi
ddmin ntta ka f d yiwi……

kukkuhu, kukkuhu…
iDS uhu, iDS uhu…
as inna uyaZiD
lligh d isduy mddn g iD…
kukkuhu, kukkuhu…
iDS uhu, iDS uhu…
tankra zikk ur tt nzznz
s urgh mqar lan atig…

Akal, a y akal…
kiyyin ad igan imma tinngh d baba winngh a y akal
nkka k id, nddr gik…igh k nggwiz nra k id s udwal…
ng ak amud… nmmuddu gh usayrur nmun ur ak nffal
nttghwi gik ur nufi ad d ik nbDu… ar nttaylal!
nurm gik actutl d twada… ar da gh ar nttazzal…
nssmghr ak taghrma s iggulla d igguna… d tirra gh ungal
win tayri inu nkki d ik… tanaDfaTt immimn f uslal…

iwi inu, iwi inu
a mummu n tiTt inu
igh nurar nkki d ik
yurri iyyi d mZZi inu
igh d nkka timnaDin
Ar naqqlay taskala
igh nghli nggwiz nit
igh nggwiz nghli dagh……

Taddinga… taddinga…
tusi awlk tasi ganga!
a tanflukt… mel agh manga?!!
mani sigh rant twwurga??
izd tilelli turu tissumga?!…
a imazighn ur nefl izuran mqar azwag…
nkk z mad ssikigh akwfay n ma
ad ssududgh ilmec unaruz…

Yan… Sin
ighrd ughrda bu tuxsin
krad… kuz
ar ittskkal umucc, idfrt acku illuz
Smmus… Sdis
isawl d udinan n wadan nns gh udis
Sa…Tam
idhls gh tillas, kra n tiddas ad ittarm…

iDr d unZar, tswa trgha
tagant am aZrf ar tsmrgha
bu iklan uRcim baqzzwa
irgha, icca, iswa…
yasi taghwrit yawn i ignna
«tankra, tankra… nkr add» as inna
d «tlilli tga lallas n tissumga…»
isduy d yan iTTaSn ar ittwarga…