Home » Tullist » IS LLIƔ ?

IS LLIƔ ?

Illiɣ ifka tisila nnes i ubrid, ar itteddu, ur issinn ma s idda. Inɣa t umary n umaynu. Ass nnes amm wasnaṭ. Imal nnes ibnubk. Kra n tmitar issumrn ur llint. Ar isbbircil. Ay-nna ira ur t yufi. Yusy anezgʷum izḍayn yugrn wi-n uẓṛu n Syzif. Gar tawuri art isdiddiy amm cra n uwddin (fantôme) zeg mayd igan aẓy. Anumc (l’amour) ur yad ili tizzulya nnes. Ikka kud iga anelmad g usinan aznezgay (qualificatif) , g usemhuy uzriw 1973-1974, yaɣ ger wallen n yat tḍeẓẓant (belle fille) . Tudf tmija nnes ul nnes alley ur izḍaṛ ad ids ibḍu. Ass nna gis ur ids inmiqqiṛ illas. Ur ar ittannay asidd xas s wallen nnes. Ar is ittemun asag teffɣ g iḍ zeg uɣasar (établissement) taf adt issiwḍ tigmmi nnes. Ar itteddu s ifesti. Ar isseflid i wul nnes ar ittirir. Akud ar izrrey s ururd (rapidement) . Id adday ids ibḍa ar ittesttul. Ur izmir ad isers afus nnes ɣifs. Ar as itteḥaḍḍaṛ snat tikkal g ku imalass. Mer yufi ur ittebḍu d ids. Amulley nnes adt iḥḍu g ubrid ard telkm tigmmi nnes. Maca adday teffɣ g usidd ur as iqqimi umulley nnes. Iggʷed adt ijmḍ (perdre) . Ur ittuyaqqil ad iṛẓm i wul nnes adas isawl s usffenẓy (franchement) . Isawl s wawal n iḥyaḍ neɣ n wi-n imedyazn. Ur issinn. Isawl asl n wad ixmmem g mayd ittini. Kud ids ibḍa inna as: «Ddiɣ ad qqelɣ, ad qqelɣ, ad qqelɣ». S askka, ikcm s tgemmi n ibba nnes, yufa yan ugudy n idlisn nna ikka yuzn ten i tuchilt (bien-aimée) nnes, ɣifsn yat tuwlift ikka yuzn ast s tmelda n usggʷas amaynu umasiḥ asl n wad ɣifs yuru meqqaṛd xas yat tawalt. Aɣent wallen nnes s uquqqḥ aflla n uy-nna as turu: «Tinmmirin inu», yannay is tderrer (souligner) tawalt nnes s sin izgign (lignes) . Tabrat n wuluf tsemxazza ul nnes. Ifsy aha ingugy g ugusif n imṭṭawn. Illas ubrid, irzag wutci. Yucy is ibḍa iɣeṣṣ nnes d uksum nnes. Aḍmmis nnes issicy as is ur igi xas yan umezluḍ nna ur yufin ma s itteqqen iburksn nnes ibbiyn s tiblaḍin, is ur igi xas iwis n ismg n ibba nnes, ismg igan aserdas aweṛḍnas ilan tawuri g tgemmi n ibba nnes igan yan zeg inbbaḍn n udefrir. Imseqsa d twengimt kud innebdr f wacal ddaw tallest ar isrrem imṭṭawn: «Is lliɣ?». Ikrurm as wul, ur yad da ittenkax (palpiter) alley da ittiɣil is ar ittemmesafaḍ d tudert. Ur zmirn imṭṭawn ad ssefsiyn agudy (le tas) n uniry (la tristesse) ikkʷarn acbu nnes. Kud yaɣul s tgemmi n ibba nnes yannay itsent tqawcin (comprimés) n usafar, ar ittexmmam adtent isew aha iffeɣ tudert irzagn maca irkkek (hésiter) . Ifka anlli nnes i tdahda (drogue) n utim (lkif) aha imtitty as. Ur izmir ul nnes ad yasy anect ddeɣ n ungaẓ. Yaẓ ad ibbeḍy neɣ ad ibedd. Ira ad isew tisent. Ca n tudert ur as telli iɣ ur telli tama nnes. Tessiɣ as giṛṛu g yat tdeggʷat s uqercad aha tfel t ar ittekmaḍ. Imṭṭawn nnes ur zḍaṛn ad ssexsiyn ajdar n ucbu nnes. Ar yakka aggʷu i turin nnes, mer yufi ad iwwet awttu i tudert nnes. Ibedd g yat tzedwit ddaw timqqa n umetna, aras qqaṛn inelmadn illan g tdala ad ɣifsn ixleḍ mar ad iffeɣ anẓaṛ isriddimn. Yugy, iqqim ddaw tmeqqa alley temmeɣ tmelsit nnes. Inna i yan digsn iddad ẓaṛs adt issufɣ asarag n uɣsar:
-Ar ɣifi yalla ignna s ufcad.

ARHAZAF MOHAMMED AMWAN N 2967/2017

Comments

  1. Memmi-s en Tmazɣa yeqqar-d:

    Asmel aya iɣuda.

    Tanemmirt aṭṭas.

Fel Tannayt

Email-inek ur d-itffeɣ ara. Urtiyen yuwren ttwaseknen s *

*
*