Isemg, Nekk gigh-t

Nekk, isemg
Gigh-t
Righ, ur ugigh
Ad rbugh
Taggwat, ur igin
Tin-negh
Righ, ur ugigh
Ad asigh
Taẓayt, ur igan
Tin-negh
Gigh-t
Acku righ
Ad allagh
Imeṭṭawen, f iriyen
Ur igan win-negh

Nekk, isemg
Gigh-t
Acku, myaregh
Ad agwemgh
Imeṭṭawen, s uraw
Gh undar, ur igan
Win-negh
Gigh-t
Acku, myaregh
Ad siggilegh isafaren
I w-aggasen
Ur igan win-negh
Gigh-t
Acku, myaregh
Tammara
Tidi, ad ka g-is igan
Tin-negh
Unfen as, idbab nes
Azzelgh
Ghawelgh
Bikksegh tuggas
Ttugh aggas

Nekk, isemg
Ad as-en sanfegh
Arfufen
Takerrayt
Sugh
Ugmimen imerẓag
N temmara
Nemyar-tt
Tga tin-negh
Neg win-nes
Igh tfessus, ar nesghuyyu
Igh gi-tengh sunfan-t
S umeṭṭa, ar as-ent aqragh
Nuḍen-tent
Nemyar-tent
Gan-t agh asmun
Nra-tent

Isemg, nekk gigh-t
Righ, ur ugigh
Acku, kṣudegh
Tilelli
Assagh nes
Mqar-t usigh
Ur tt myaregh
Ur tt ẓrigh
Ur tt righ
Imula n tuttut
Agh kligh
Agh nsigh
Agh ddergh
Azenẓar nes
Ur t ghwigh
Ur t annigh

Nekk, isemg
Gigh-t
Acku
Ur righ, ugigh
Ad-t annigh
09/12/2010

5 tannayin

  1. tzdart ad agh tmlt aggas ngh nkkwni imazighn s imik n izlan immimn irZagn. ayyuz nk, tamdyazt tga tisit lli gh ntatrajidit n imazighn

  2. Azul aseklan,
    Tanemmirt ijjan a Mass Mohamed Oussous f tguriwin nek ifulkin d tugga nek imequren.
    Ha y agh numeZ abrid lli s agh tezwarem, necukku tawada nnun, ar ntelmad gh tarmit nnun.
    Tanemmirt irghan ijjan.

  3. Imik n izlan mmimnin ffaln tirZgi gh ungha n ul n umazigh ifrkn!!
    Ayyuz nk a mass, timitar n umdyaz idusn ayad! ayyuz nk

  4. Azul i umedyaz nnegh axatar Mass Amasine Atanane :
    Illigh ghrigh tadyazt nnek syafagh tafssi nnes ghif ils maca syafagh digh aZaZa nnes ghif wul .Tsawld gis s wassagh n ismeg iran tissumga d taskwefelt tis-snat negh tis-kraT i ighf nnes,ur irin ad ifrek s usaris nnes amazdar iddegh imyar tirriza ,iddegh ur issin amak n unumka d uburz,ar ittenneD i usidd n umili nnes am tiberbillut.Ad agh yarey Rebbi zi tissumga n uwayT.Asirm inu ad teg tedyazt nnek asafu ittesadadn abrid n tilelli dat isemgan ur issin is tella kra n tudert yaDn berra n tissumga.

  5. Azul aseklan
    Tanemmirt nem Lalla Aziza f tugga nem d iwaliwen nem immimen. Iga yi addur axatar ad gegh yan zegh tawja n imedyazen d timedyazin n tmazight.
    Tanemmirt nek Mass Aghezzaf f tguriwin nek tifalkayin.
    Afus gh ufus, ad nesfalki imal n tasekla tamazight.
    Tanemmirt irghan zegh w-allagh n w-ul.

Fel agh tannayt

Your email address will not be published. Required fields are marked *