Tagwlla ittirirn…(Tarzzift i igigiln)

Ighd yadlli ur igi Rbbi ay aryal itcan
Timzgid d tnbbadt d usnbaghur gh nttan
Nkkwni lli gikk skrnin argaz ann idusn
A xixxi n tmngfin a tasra tixinna yasusn
Ighd a rad tgt ngh afaynu ngh akkw asaghur
Isur fllak umugay yakwl fllak w aghad
Tssalit awlk n uzwag abrid illasn n tkssad
Tsalut i tzamma a bi ifaddn tzrmt i umrmur
Nssls ak nfk ak tiram d illi tngh s iwil
Trwlt i lfqqih d lmxzn trgmt idulan
Taqqbilt ay agacur ark inn tmmal s idudan
Ad kid irar Rbbi s ubrid n unnli awr imil…

Ajjat iyi tngham iyi grat s ikrkas
Yafud ul iw atay yafud i wadt iswan
Tisnt nnun ighnn yad gh tikinin llant
Add gisnt ttbaqqant yan tnt iccan ad nqqant
Abrid nnun ur iffaw anu nnun agwdi izwan
Ajjat agh nswa tirgin sisnin gh ugharas
Arwass ad righ nfrk tadankit ann tusim
Ann iss igr yan igan zund nkkin sawln
F izrfan n ufgan igan aghrfan turim
S ikrkas gh ubrid n tdrfiyt lli rad ghawln
Tagwlla ittirirn aqbur inna yuf tnt laz
Tagrawla as tusi tura tinitin d ungaz

Farid Mohamed Zalhoud

  1. ghZann willi ttinin mas d amdyaz ad igan ils n ufgan, slawant akw igh iga anaw lli iddrn gh tmmara ngh ZZlT… ngh iga awd igigil!!
    amdyaz ifssus usyafa ns!! ar isyafa s kullu mad as issutuln! d kullu mad izzigizn iggi n wakal!
    s ugrD n igigiln ar ak ttinigh tanmirt d ayyuz f izlan ad fulkinin!

  2. Azul ultma Aza
    Tanmmirt f ugmmay nm idran ilan atig igan wayyad iy izlan issfra tannayt taranawt gh tilawt irzagn n igigiln macc igigiln frknin i gar tasrtit lli iran ad gisn tskr ismgan n gar afgan ! ! !
    Tagwlla ittirirn tga yan w awal aqbur art ttinin imazighn:
    “Tagwlla ittirirn yauf tt laz”(Mieux vaut la faim que la bouillie qui chante)!!!
    Tanmmirt ultma
    Azul i gwma Mohamed oussous
    Mahac Tunaruz
    Gwmam Zalhoud

  3. azul mass zalhud, tamdyazt ad nk is tt nit tga!!!!
    aZllay n urgh gh tzra n izlan, ayyuz nk. amdyaz iga bdda amdyaz itri ns ur ar d iTTar, ur ar t inn lkkmn iZran n wanna iran ad t id izzugz! tanmmirt f udraw ad nk.
    ad ur ttugh righ akk sqsagh f yan snat tguriwin uckant d gh tmdyazt ad ur ukzgh ma mi tnt ttinim: tixinna d afaynu d tsalut i ..afad ad isfiwgh uggar ammakn idran n wawal nk.

  4. Azul gwma ia^zzan Mohamed
    Tanmmirt f tigurwin nk lanin atig ganin atig i umdyaz d tmdyazt!
    Tigurwin ann lli gh tsqqsat hatnt:

    tixinna: kra n gar afgan(illsn,irkan)
    afaynu: tumzin ighd ir ghliynt igh ur lant tiznfin;gguffant urd ghlint,ur gint amr afaynu art mggrn middn art akkan i ughyul ur art ttawin s unnrar acku ur ili taznft !
    tsalut:trzmt(ar nttini isalw w azzan ann i ixwliln).

    Tanmmirt ar timilit
    Gwmak Zalhoud

  5. azul imdukkal imdyazn d imaratn ixatarn
    righ ad smdgh yan usisfiw f tguri lligh isaqsa mas oussous
    tixinna art ttinin gh darnx i axlil iqqurn gh tnxar
    tanmirt

  6. TIMDYAZIN CQQANIN BAHRA DAR GWMATNGH ZALHOUD AMARA D UMDYAZ AKSWATH TIDUGAMIN DRANIN ISWINGMN D TWLLAFIN LANIN IFAYRARN AR TTAYLALEN ZUN IGHIWR URT IMRI WAKAL ULA MRANT IGNWAN. GHIKLLIK A DADDA MOUH TAMGHNAST AR ADIF TI3OURMA TGAA TINK TGT TINS AYYOUZ NEK

  7. Azul gwma Amaynu
    Tanmmirt f isisfiwn llid tiwit gh tabratt nk
    Ark ssimghurgh

    Azul gwma Abdellah
    Tanmmirt f tigurwin nk dranin lanin atig ganin wayyaD i tgwlla inu lli ittirirn gh tmdyazt d igrn s umTTa ijdrn asTTa
    Ark ssimghurgh a Peter
    gwmak Zalhoud

Fel agh tannayt

Your email address will not be published. Required fields are marked *