id d w-azal .

Daoud Garhou

Tlla yat tddagt g yan udghar tga gis tawliwalt ar av ttals f umsawal isarn ngr usklu d wazal, tssfld asn ar ttgan ngratsn xf manwa gitsn yufn wayyad, ar ttini tga tsmnawalt mk  a :
id :nikkin d afalkay, ar yi ttirin iwdan,siggiln siti ku igh thma
Tafukt.
Azal : nikkin t igan, akud nna krmn ar tn ssrghagh.
id : agarn winnk ad gan, tskrt fad gh izuran, tssighart tazgzut, tsnflt aman gn iragwn, ar tkkndt imaddurn s marur, bu tkrkas ad tgit !
Azal : aqq…a bu ibadan !!, kyyin am ittyawssan ma d ur ifulkin, tssntalt Ikwlan n tghawsiwin, tskrt gitsnt tisgganin, tjlut abrid i inmmaddutn, ar Tssiwidt ihnjirn s imzan nnk, tsgnt imudar.
id : gigh asunfu n middn ar giti srusn i twwuriwin lli s tn tssrmit, nsn g ddaw n usddul inu, ggh azmz llig ssflidn imzzyann itallasin hlanin.
Azal :  ar ka ttalght agayyu nnk a tillas gh ttilint taghwznin ; nikkin tufawt issisfiwn ibridn, gh usayrur inu agh tturarnt tazzanin,igdad nttni ar ttaylaln, ssnwagh tajummadt gh ifrawn n imghayn hma middn ad afn uksijin,salan tudrt nnsn.
id : imghayn gigh asn amawas ad imghurn, gh wakud inu agh ttafan uksijin lli asn ttkkist , da tn tzzluft s tzghlt nnk .
Azal : agris nnk as tnqqat igdad gh igwdfan,nikkin ar ssiridgh tadlut nnk s tufawt n wayyur.
Taddagt ssusmn tt iwaliwn lli mi tssfld, tiwi d inghmisn is azal d usklu iskr tn rbbi gn yan w-aylan dar uddur axatar i imaddurn, gn sin igzzumn g ittyawskar wass ; azal d id as illa usittn n irn d isggwasn n tudrt, da ttilaln s umntil n ulully n wakal xf tafukt.

Fel agh tannayt

Your email address will not be published. Required fields are marked *