Tudrt n imal

Tgwmrt iyyi ka sul kmmin a taguri
ghalgh yadda ma d ndra idda ad ingiri!
lligh d yasus wamud nnm gh ukwba inu ifruri…
art ttkwfasgh gh igr n tirra… imghi nns i tghri
izbu nn waylal bu uzawan azal yan imikk iffarri!…
ssmdigh as ass ar ass timdayin… qqlgh add yurri!…
gagh am kmmi d is… nkkin amkraz amwwuri!…
tgt iyyi tudrt… tilit iyyi!… tilit dari…
zud tifawt, tudft ar asa n tasa lli dari!
tg am tansa n taghnsa… taft nn tantla gh ifri!!
tssgrdt tnt… tgrd am… ar ka s iti ttmdurri…
igh d tngi s imurig… gagh am ismx imiri!
ar km ttaragh igh km turu tasa inu a taguri…
ar am snyifilgh iklan d unughn n tZuri!
tZult iyyi s twwurga anelli inu d iZri!…
asint iyyi s aflla ghawlgh iTTij d taziri
ar iyyi tsufut kmmi a tudrt zud itri…
irigh ad gim sunfugh… ad nttu ma gh d akkw nbri…
irigh ad gim sunfugh… nttu tammara lli nzzri…
ar am grragh s ifalan n tifawt a tayri
azTTa n umTTa… ilsa unughn n tZuri
azTTa n umTTa… tarragt nnm a taguri…
a tudrt… a tudrt n imal igh ndda nzri
nkki d im nmun s imal a lalla taguri
gh tirra d irir… ad nddr ur sar nzri!…
a tudrt n imal… a lalla inu taguri
ssmdigh km inn sar a lalla i tghri
sul ssmdigh am d taskala tin timghuri
inna gh nn tattuyt ighawl km inn imghri
irir km umarir… yall s im agrD bu ughuri…
asin taghlaghalt nnm idurar d idirn n tiniri…
a tudrt n imal… a lalla inu taguri
taDa ngratngh nkki d im ad sar ur nengiri…

01/05/2010

  1. Azul ssi Ouafi,
    Ayyuz d tanemmirt bahra ijjan f tguriwin ad ittuystayen. Tamedyazt nek tZil aTTas aTTas d ra-d terZem taggurt n tghennant ger imedyazen ad grun d ad stin tiguriwin fulkinin gh tagant n w-awal ad skern zund nettat.
    Mac, is ra-d iZdiren?

Fel agh tannayt

Your email address will not be published. Required fields are marked *