Immut unaruz ?

Deln igenwan s imedla n tguḍi
Tels tafukt timelsit n tkerẓi
Nteln-t tifawin gh tillas n tserfin
Ttuykrafen izenẓaren, lan tigusin
Ar suddumn imeqa n umeṭṭa, gan imedwan
Ar gis-en ssan iẓuran n w-addag irufan
Ar salsan-t titbirin tigellinin
Ḍufen-t ukan tiferḍt n tgaywarin
Zugen imula, feln isek°la
Qaren-t tilemsin d ighbula

Ẓulen-t temgharin s taẓult n tkeṣṣad
Gh°emn-t tawenza d tik°yaḍ, s takut n ufcad
Kksen irgazen tamart, qenen taxasit n telkkawt
Asin tirriza d unezgum f tadawt
Ur ar sul ittwarga w-azzan
Ijiwjiwen ka-d as igan asmun n w-aḍan
Rẓagen-t tiram gh imawen illuẓan
Izug iṭṭes tiṭṭawin n ufgan

Ma-d d igguran ?
Induhda w-akal
Rẓan iseqq°al
Ma-d d igguran ?

Immu-t unaruz, ur-d ifel arraw
Ingha-t uzeḍḍum s isufa n tillas
Ittigil imal gh isalasen n twargiwin
S isugal n tkerkas
D izakaren n tiggas

Amawal :
Takerẓi : Aghiluf
Taxasit : Rrẓẓa
Talekkawt : Lheg°rit
Tirriza : tadallit

Abdullah U Muḥemmad Aclif (Amasin)
Juin 2010

Fel agh tannayt

Your email address will not be published. Required fields are marked *