Immi …

Khadija Arouhal

Fk iyi udm nm
Add gis agwmgh afulki
Mas sswagh tifras inw
Hbbl iyi s iZula nm
Qqn flla irgl n tiTT
Add ssukfgh iZuran n umTTa
Yawi iyi iDs gh iZri nm
Ml iyi azmumg nm
Fk i tudrt inu anaruz magh mTTln
Ussan inw

Tayri nm …
Tayri nm …
Agh immrks ill d unZar
Yaru taDDangiwin n tumrt
Biksn gis ussan inu
I tgwmrt asin tukaD
IliH mad gwmmrn

Ddmgh gh tayughin n umarg nm
Sgrawlnt iyi
Ggh aluffi mnid n tzninga
Fsigh gh imlaln n tghufi nm
Man tanawt
Man aghrrabu
A rad iyi yasi s iftasn n urin nm ?

Is gis tfl tizi
Magh ghwmmagh s usyafa nm ?

Yusi gim w akud awullu
Ar ikkrz iDrfan gh tdusi nm
Issfsi adif
Issif afud
Ig tandra nm d uZawan gh unbdu ns
Ar imggr s tmuDan gh tghssa nm
Ar ittkkis irifi ns s tidi nm

Ittu km
Ittu iyi
Ittu is ur rad tg tyafut ns
Amr amTTa nw

  1. azul fllam awltma khadija.aram tinigh ayyuznm ghrigh tawcckintnm tssusmyyi bahra kml fmaya han ihla mna yufayan ayg zud kmmi.tanmirtnm attas

  2. azul ultma nu xadija,
    TZil bahra tgharast llis tgwnit tamdyazt ad nm… ar km ssimghurgh…. ayyuz nm

  3. azul brahim tanmirt nk attas f tannayt nk
    azul fatim tanmirt nm ultma ar ssirimgh ad iligh gh uswir n tannaynt mn bahra issusmn tanmirt attas
    tanmirt ultma aziza iskil nm gan iyi addur

  4. ayyuz nm awltmanu khadija,mayad issumiyi bahra,
    nmyar gim iwaliwn d kkanin ulnm isfan,
    ghmkad an gim nmyar d ghmkad aggim nra,tzzil bahra tmdyaztad agh tkfit assrs nktti innatngh
    ayyuz ayyuuuuuuuuuuz nm

Fel agh tannayt

Your email address will not be published. Required fields are marked *