“Ka ar sul ittgga akkw!”

Iga yan u3zriy, ar ikssa i mddn ulli nnsn s tirmt, ar as ttinin: Hmmu n faDim .
Yan t yaddrn ar ittini: is iga bla Hmmu n faDim!
Ur t id iwint tmgharin f yat, igh llant gh tsukt, ar gis zrrunt tilikin nnsnt, kwsnt tiklmiw nnsnt, kwsnt f iqllula nnsnt, Hmmu isswa d ulli nns gh w-anu, lligh swant, gwnnt, iddu ad icc gh tgmmi nns, yaf nn  yat tmghart ifrd gis uqllal nns, ar as tzrru tayyaD, tnna y-as : han yan urgaz yiwn d i tsukt!
tnna y-as talli gh tfrd tillict: ah! Hmmu n faDim ka ayan !lhurma nnm ad ax ur isngira d tillict! nghwi ka sul yan snat, tnghwt iyi kra n iwttn !han sfawgh akkw, ad km gigi isrbh rbbi, izuzwa iyi akkw uqllal inu! tadggwat tawit nn imik n ughu han hra t ukan sndix!
acku timgharin ar d tnmuqqurnt  tasuk n tmazirt, ar gis zrrunt tillicin i ixfawn nnsnt, mic Dufnt ad tn d ur yaf  kra n urgaz, kksnt f iqllula nnsnt.
Hmmu n faDim ar tnt d bdda ittafi kksnt f iqllula nnsnt, ar asnt issflid ar ttinint:
Hmmu n faDim ka ay-ann!
Ur ar tthDunt iqllula nnsnt igh ira Hmmu ad izri gh tsukt, ar ixssi wul nns, ur iri ay lli s ttinint tmgharin, gant t d zund nttnti, ur darsnt ili atig, tanna isawln ar ttini:
is iga bla Hmmu n faDim! is iga bla amksa n wulli!
Hmmu ar ittxsay wul nns, ig nn tuggas nns, imik s imik iskr yat thruyt ig tt gh gr ulli n ayt tmazirt, ar as ttaru.
Ar zrayn isggwasn, atint wulli n Hmmu ti n ayt udwwar, igh tnt d issruh, ar zlaynt gh imi n udwwar, ukan ar tnt smuqqulnt tmgharin ar ttinint: ulli n Hmmu ggutnt ilmma, aqq Hmmu iga ilmma argaz! irwas ilmma igllin n babas s3id!
yan ilmma isawln ar ittini: gutnt wulli n Hmmu n ayt s3id!
Ar itdda ay lli gh iga Hmmu win ayt s3id, ur sul igi win faDim gh imawn n mddn.
Imik s imik ar izznza Hmmu ulli, ar itddu ay lli gh iga a3ttar, ar d ittawi i tmgharin lli t ur igin d yat, tswik d tazult d lhnna d nqwrt, ar asnt izznza, tanna iran ad dars tsghw, ar as ttini: mnck as tzznzat tazult a Mulay Hmmu?
iga ilmma Mulay, ar ittkka timizar, ar izznza i tmgharin, ibndr, ijji, iml i mas tadfi n tudrt, ur sul tlli gh tmmara, ar itdda ay lli gh iga  anmghur n tmazirt, ar as ttinin:
Sidi Mulay Hmmu !
Yan isawln ar ittini: aqq inna akkw sidi Mulay Hmmu!
Isugr ilmma w-awal nns, ar ikccm imzzagh n ayt tmazirt, issaDu Hmmu aswingm nns s tghwrDin ar ittini d ixf nns:
“Kra igan ka, ar sul ittga akkw!”

Fel agh tannayt

Your email address will not be published. Required fields are marked *