Tirra s tmazight ar tbughlunt s tuggas n tarwa ns “imaratn d tmaratin”, ur sul tgi tigigilt, ur sul tlli gh tillas!
Ghila d taskla Tamazight tfsr aswingm ns i ugdud afad ad ifrk mas d tutlayt Tamazight tga yat tutlayt ngr tiyyaD, tga tutlayt n tirra d tighri d usnflul…
may ad ur illi abla s twwuri d ubddad n willi usinin anzgum ns!
Ig mass Mohamed Garhou, yan gh willi mu iZZay watig n tutlayt ns tili gis tismin (la jalousie) f ils n tmagit ns ad nn tili gh uswir yattuyn, s mk ad ar nn nttafa mass M.Garhou ar isnflul s tmazight, tirra yad ns gant talalit n yat twckint n tallasin timaynutin gh ugadir zgh igiwal n tzazwlt n Al Aqlam.
Mass M.Garhou isti “iRZag yimim” ad ig ism n uDris ad ns, yura t s uskkil alatin, ilint gis 11 n tullist d 56 n tasna.
Asktur n tadla yad iga mka d :
1- Timight n uzlmaD d ufasiy
2- Yiws n mas
3- TakyuDt n wurgh
4- Tigni n tgccult
5- Mas n waman
6- Tiwwurga  ganin azal
7- Uxsan n wurgh
8- Zayna d tfullust
9- Iskraf n tayri
10- Tazzaghra n tattn
11- Ammuddu n igwra
Tallasin n udlis ad mmimnt s tgharast ula aswingm lli s tnt yura, d tiguriwin ns fssusnin d wammakn ns ZZaynin, macc gh tgira n kra ygat tallast ar tsyafat s kra irZagn, “kra” yan as ira umara ngh ad t isslkm gh tirra ns, zund anzgum f ils amazigh d tmmara lligh iddr ufgan amazigh, d watig n unaruz gh tudrt…
Tallasin ad ar nn gisnt bahra nttafa timitar n tussna n tmazight d taysi ns d umiyn ns ar d gisn issa umara, issls asn timlsit n tullist s udm ns amaynu lli d ikkan uruppa.
tallasin n mass M.Garhou gant anzgum n iZuRan ngh, tiggas n tudrt ngh d wasirm n iman ngh gnt awd asafar n isttighn ns d wingh!!