Akal

Akal, a y akal…
kiyyin ad igan imma tinngh d baba winngh a y akal
nkka k id, nddr gik…igh k nggwiz nra k id s udwal…
ng ak amud… nmmuddu gh usayrur nmun ur ak nffal
nttghwi gik ur nufi ad d ik nbDu… ar nttaylal!
nurm gik actutl d twada… ar da gh ar nttazzal…
nssmghr ak taghrma s iggulla d igguna… d tirra gh ungal
win tayri inu nkki d ik… tanaDfaTt immimn f uslal…
nsmun ak d i tmghra nnk gh taghzut isan n umawal…
Akal, a y akal…
tumrt nnagh ghilli gh tt inn gik nmzalal
nkkusa gh imzwura sar ad t id gik nsghal!!
ukan ng nn d ighnan taghnnant! ar t inn nttghawal…
taghwrit nngh tstara sigh adrar d uzaghar d imudal
tmun d taghlaghalt n udinan ismurign gh uzilal…
d tinaruzin ismrghan gh tudrt nngh… tin imal
nagwl issn imggraD! ar k nsswa s idammn d tidi nngh a y akal
ar igh ifaw iD nnagh, ar isufu gin azal
turri d tifawt iZri n wad da yad igan adrghal!…
ar naTTu amurn s ighallen d tardasin d izmmuZZal!…
ncbbr gik s tfasa d ifassn, i gar ar k nssntal
nttghwi gik s tasa d imassn ar ak nsghudid imal
nttghwi gik s tasa d imassn… ad ak iZil imal…
Akal, a y akal…
iklan n tumrt nnagh ra d tn sakagh amaDal
s tutlayt inu tamazight, lalla s n kra igan awal…

18/04/2010

Fel agh tannayt

Your email address will not be published. Required fields are marked *