Taghuyyit n w-akal

Ikka tt nn wakal, ijja, ighws, ar ismghay tugt n wanaw n tuga gh llan isafarn, imamn waman nns, igr gis ufgan izran, ikws as afrig, ig as amazir n willi, iDrs as tighuniw, ifk as azrf nns, ikrz gis tumzin tiqburin lli d imghin s waman n unzar, nunt s iznzarn n tafukt, is nit jjant, yili gisnt usafar acku ur d nkrnt bla s waman n unzar, ar iskar tigmmaw nns gh izig lli ur ismghayn gh ddu ugnza bac ad ur isxsr akal nns lli gh rad ikrz lmunt nns, izzu gis ula asghar, ig ufgan win wakal, ig wakal win ufgan.
Ar zrayn wussan, yaru ufgan tarwa nns, yiri tigmmaw hawlnin, yiri tugt n umtcu, ur t  yudi imik, yiri tugt n waman, ityawsnfal uzmz, afgan ur sul t issuhl wakal, ittu ajmil i  tmazirt nns lligh d ilul, issafu gis awal, icc gis tiram lli isgmmn ifadn nns, tkurnt tghanimin n ixsan nns s wadif, iskr nit ixs bu wadif, ar is itbbi idrarn d izughar d imudal, ar is itkka tizi n wafatn.
Azmz  ad iskr tislwin, iskr  buxruru, iDi t s wakal, isfk t iygran n tyrza, ar t ssumumn ighbula, ar allan waman n wuna ula win isaffn s tjlxiyt n ufgan, ar itbbi asghar lli zzan id babas, ar sis isnwa aman mas issirid tirkit nns, iffin tt n gh wakal lli as d ifkan aman ula asghar, ighli wagu d ignwan, ur t yumi wakal, yawi sisn tamaDunt, ig wakal taghuyyit, ar ittini:
Izd ayafgan ur thccmt! aynna smghix, tbbit, tcct! ur iyi tsnt ajmil! kyyin ur ar tsmuqqult bla ixf nnk! kyyin ur trit taxnanast gh tgmmi nnk, ar iyi tt id tffit gh udm inu ! ar iyi thlakt s irkan nnk!
iga kullu wakal unhihn d ibrrayn  lli gis iskr ufgan, tili gis tfidi igusman, zlfn waddign nns, ibbi fllasn ufgan aman, ar allan islman gh ill, tghli tzamma d ignwan, tk gr ignwan d wakal, yawit wadu, tkcm inxar n ufgan, yawi tt ughanim n wuran, yaDn ufgan  idmarn nns, tili gis tmaDunt, icca kkwah, tut t tagat n wakal .
Ar isghuyyu usghar ula nttan, ar ittini i wakal:
ghwid ur snn bla ad gigi kwsn igumma ! rzn ighzdisn inu! rzn izqwran inu! luhn agDDum inu! bbin flli aman!
inna as wakal:
Tinu ar mani, smghix as t id mimnin! iffi d gigi arras nns! icuwrit ukan ufgan ar d  iyi ikcm afus ! rad as mlgh atig inu!  ur akkw sul izdar ad ka gigi  izzu kra n waddig lli rad iyi iskr amalu(asklu)!
sllan waman i tghuyyit n wakal d usghar, nnan ula ntni:
nkkwni ngha gis irifi, irar d srngh agusmu nns!
Gn d ignwan ula ntni taghuyyit ar d sawaln s wakal nnan as d:mad a wa ka gik isnwa ufgan ayakal! ksnt kullu walln inu s waggu !
Inna as wakal:han afgan ur sul isn mad t yaghn ar ka itghawal!

  1. Azul mass M.Garhou,
    Ayyuz nk.
    Tamukrist n ufgan tga tt mas d is awr ittmnid mann yaggugn i inxar ns!!
    ghar ifrd gh tudrt! ighal is rad as tghama mklli sas tt flln willi t zrinin!!
    Anaw ad ifka t rbbi… ar ttinin yadlli, mla d isawal wakal, ikut ma rad kullu ini i ufgan!!
    macc aylli ur ukwzn kigan n middn, mas d akal ar ukan sisn isawal, is akw aytgga taghuyyit, is as ka ur ssflidn… ngh d ur ran ad as ssfldn!!
    Ayyuz nk, tssusm iyi bahra tallast ad.. ar nn tkkrz kigan n tguDi gh wangha n tasa!!
    zuZdgh ad tg tallast ad nk, tabrat i willi tt ur ttawin gh wakal ula aman ula kullu mad ismghay wakal!!
    Ayyuz nk tiklit yaDn
    Tanmirt nk a mass.

Fel agh tannayt

Your email address will not be published. Required fields are marked *