Lal sar immut umdyaz

Turit agwmmay zwarn,
HrDid altu nekki, ils yi,
lsagh t giti igl fghnit;
turtit n irafan a ghd akufgh.
Man mk; s man ik ad itmmtat umdyaz?
Tuga itnuccugn g umalu,
d immghin jar n takat d umsay
g iD ismraran amaDal ad as adrn
buhn itran mk da ran

Man akud; mani g jjun immut umdyaz?

Nnan tmmut a Dda Ali !
Tsult g iti nsul g ik
yat tguri nk tsmdadi ajarif;
asusn isasan i malxf.

Max id bab n tguri ar tmtatn?

Wi d innan tmmut ighwitn ungaZ;
s tawda ur asn izray w-aggaz
imal nsn irZa s ulzzaz
azigi n tkrkas ig ad akwZaz.

Is ur igi tarwla ad immt umdyaz?

Yan d ildin asqsi v imi n uznZum;
sslkmnt i uderDur istan.
Yan d izzugzn amanar
isakt f udrghal ifaw

Max ur izmir ad innru tamttant?

Aggwi d a Dda Ali smaql
imakrn n umzruy,
tawda tzDa tn d ubray
antl a sa tllin g usray
nnan tmmut! tgt umiy

Mamnk ad immt waylal n takat?

ghaln k ahyyaD iDfrn titbirin,
ghin t iruh iD rad k in gis ttun,
taf ilmma hrima-uzalim isgun
sigh assid a tgit trZit asn asirm.

Dda Ali ur tmmut sar nk
Mad ur tssent :
ayda tirirnt walln ik
d issufa smrghanin
lli tsmktit sar xsin.
Wan tn yukin
ig asmam
sun d g uglmam
kkisn akmam.
Amud n immi d immi k
ghin f itters gin ajjig
mqqar llan f ugharas dufn t
sar t ilkm gar afus
Dda Ali sunfu …..

Fel agh tannayt

Your email address will not be published. Required fields are marked *