Zund Aggu .!

Tarezzift i gwma ITRINIT
Tafrawt yat kad dari
Urd snat ad semghigh
Zuzdegh ad ffarrigh
Uyelgh dergh gh uknari
Ur rwasgh afullus
N ger tifullusin
Ur ssengh adermus
Ad gegh bu tallasin
Ur ssatunegh ameddakwl
Krad ka izerin felli yakwl
Sghawsagh abaw d ufraw
Meqqar gigh war anaw
Igh yad ufigh tiremt
Tecku yi gis tumert
Terzag iyi tudert
Taghamt inu tighermt
Immi gigh amagus
Ittuten s gar tazzit
Utec is gan amasus
Issus ufus tummit
Tiddet inu tega amersal
Aggu nes win unesal
Midden ran ikerkas
Tuslight gh umerkas
Yan dar adrim llan
Yan dar anneli ar allan
Amezlud d usenbaghur
Rad akkw gin asaghur
Ha tifert ha asuru
Ha tuzunt ha asaru
Ha may semghi w akal
Ha may semghi w awal
All sers mmagh d ugdud
Afgan a gar amud
Ur sar tenghit akud
Sar ak irmi wafud
Ah inu gigh tasalt
Gh tamurt tanafalt
Zund tufdilt gh ufellun
Wiyyad is uten allun

  1. Azul mass Zalhud,

    Ayyuz nk f tmdyazt ad ilan atig
    tfk tujjut d ifrawn iklan zund ajddig
    awal immimn igan aslal izddig
    talalayt ns ula aZawan ns izga irggig
    nmalan izlan ns zund ifalan gh ifggig

    Ayyuz nk a mass.
    Tanmirt.

  2. Azul Massa Aza
    Ultma Aziza,ar km snimmirgh,ar km ssimghurgh f tmadyazt nm igan taghlaghalt n tmdyazt inu
    Ar am ssirimgh tawada ifsusn iziln gh taskla tamazight
    Ar timlilit
    Ujjigh am afulki d ufra d tumrt gh tudrt
    Gwmam Zalhoud

  3. ayyuz nk a ssi muhmad
    akr nssimghur f tmdyazt ad nk f w-awal nk lli kullu igan ifrawen gutnin yusin kigan d rric lli usinin kigan d uswingm sawalnin f w-awal amazigh sawln f w-anaw n ufgan ula akal ula ma-d smghin.arak ttinix a ssi muhmad ad isfulki rebbi tudrt nk ig awal nk d ufrujju lli rad afn inxar awin t s w-ul ifssi gis ig aman d idamn ar iswa izuran n ddat n ufgan.
    tanmirt

  4. azul mass farid moh zalhoud
    ayyuz nk f tmdyazt nk d tiguriwin mmimnin , ark bahra n simghur f iskiln nk li yusin anzgum n imazighn .tiguriwin nk lid faghnin gh ugns nul fayrnt awint tumrt d tdrfit i ufgan amazigh.
    ayyuz mass
    tanmirt

  5. Azul gwma amdyaz Mohamed Arjdal

    Tanmmirt fw akud lli tfkit i ugmmay d ufrak izlin s tmdyazt inu !Tawal inu ar kssimghurgh ar k snimmirgh f tigurwin nk lanin atig ganin atig itmdyazt f umdyaz
    Ar timlilit
    ujjigh ak afulki d ufra d tumrt gh tudrt d tuggt n usnflul gh taskla tamazight slawnt akkw tamdyazt
    gwmak zalhoud

Fel agh tannayt

Your email address will not be published. Required fields are marked *