Iwiz nm

Iwiz nm
Iwiz nm uggug n twargiwin
Ar gis brrigh tuctal n id
Lsagh gis aggu
n tmktit nm
ssudugh tuddimin imdla
ndrgh d wasif n tghufi
gh izuran n ul
s targant ngh
ar grrugh imula ns
nlm gis ddmin
ndl sis izlan ngh
iwiz nm
askkil ittyaran
gh tbacilt n uzwag ngh
ukrnt itran assis mktin
ilkmimzn n tdrfit ngh
ad trgh takat
yisfiw wayyur imttawn n tullist ngh
afn ikabarn ibridn
s taddart ngh
biddn izmaz f tifdnt
n tmdyazt ngh
iwiz nm
ahbu gh tazzaln
imuzzar ifssi
tgdn gis tafukt
taghwrit ns
tstgh tugga asayrur n id
fissn imawn
sawln ulawn
tjlu tguri gh igr n tdrfit ns
tmghi tgudi
tfsu
a tayri gh twargit nm
iwiz nm
askrf issan gh tidi
n tusdadin
qlgh sim ad taggwit gh usatm
n iman
ad thllilt igadrn n tghyyit inw
ad tzzigzult agharas n tudrt
tssntitt gh uzmumg n tzgzut nm
hiyyaght gh tzughi n ujddig inw
iwiz nm
agh gngh f utrs
klugh s ijiwjiwn
tawargit nm
iwiz nm

  1. azul amdyaz amqran iwiz ngh tguri iziln tad nttafa gr izrirign n izlan nk iwiz ngh asyafa iziln wad mu nsyafa gr iskkiln n tmdyazt nk ayyuz nk tullafin zilnin aragh tasint f imdla n twurga nzug disnt nggami ad nrzm izri f tillawt ayyuz ayyyyyyyuz

  2. Iwiz nm a tamdyazt
    taguri n imTTawn d ufray
    ikkrzn istghan d ufssay

    tirgin n izlan ns
    agh-d ilal ulkmass
    n tlalayt..ns!

    askkil agacur..!
    tumert ns,
    agdud ns!

    Ayyuz nk a mass..
    a bab n iwiz ngh..!

    tanmiiiirt.

  3. azul aytma istmm
    igayyi addur bahra mqqurn adiyyid taramt man tiguriwin ad slawn akw lligh gant tguriwin n tiwtmin zund itran attuyn ar sufun.. ard akkan i wakl tifawin ..
    tanmirt nm bahra ultma khadija f iwaliwn
    tanmirt nm ultma aziza f izlan llid tsmdt i iwiz.. tadfi nsn dagh ur tli anaw … thda gim tmdyazt mqqurn.. taguri at innan urd nkki
    ayyuz nunt

Fel agh tannayt

Your email address will not be published. Required fields are marked *