Yan ugzmi seg ungal n Xayrddin «Il était une fois un vieux couple heureux»

Yat tiylgi, kra-yan isduqer taggurt, immatti wawssar ad irzem, izma nit llig yukz imzzi, ur sul izzig kra yusi: d amddakwl is aqbur g Fransa yudhad,  mad n ikka kramraw iswggasn g uzwag izdin. Ismmerhbatn d id ssalamuolik wartalla hyyan,  alin nit s tmshrit,  skkiwsn yan mnid n yan muckkun i ngr a tsn yat tizi icwan.
–  Ur akkw bahra g ik yiwi uzmz yat,  as inna wawssar. Tsozrit sul ukan,  ini is tn tuft g walln n tiwtmin. Mad d igguran a Rdwan lliv d tktit tackid? Ini yi mad ak isuqsn tbbit d g uqccab a Rdwan?
–  Yad kramraw iswggasn ad n sul ur uklgh g tmazirt. Mas ak tnnit ad t ghid stthagh, yan ur itthafn sul yan …. ma ur igin kyyin ad sul illan ghuri? Mayan a xfn ghamagh dinna. Gagh afransis zund nettni,  ar frrugh tifgurin,  ar tzatigh (je vote),  tadimukrasit nettat ayan. Dari kradh warracn,  yan ar didi iswwuri g thanut n igr-amtcu (agro-alimentaire), sin llan s twwuriwin timslalin,  yan adhbib,  wis sin amnoar,  kra yi d igan adhar amr amarg ad k zrgh aggwighd s ik.Bbigh d tanfult n tsafagt am amallay, iligh d xf lla’k. Sin ikertun fkigh tn id i Lkar n Bariz-Tiznit.Lkmgh d ghfrgh yat tamubil,  imalas ad iwigh,  ur rad tin akwigh.
–  Ur g is act-ar-ghi! As inna wawssar.Hyya rad tmklut di dngh.
–  Mit za.
–  Tnst dar ngh ar azkka.
–  Uhuy,  ur as ufigh,  ghuri kra ilmuqqarn di Agadir. Ikartun lli rad k id lkmn ar gr ifassn ik,  accafur s ixf is a rad ak tn d isslin.
–  Ur yi yuma mani s tumrt allig k zrigh. As inna wawssar. Is ar sul tssat atay?
– Aqq mit iz! Is as d smdgh azyir icwan,  d tismmadhin zuzwanin.
Agam an ad tdlf tawssart,  tanaragt n Bucoib, s tmshrit.
–  Smaql za,  zr iz mad iga wad dar ngh yuckan? Isqsa wawssar.
Tmuckka as yan imikk, tini
–  Wahli hrmgh t , gammigh ad t akwzgh.
–  Is nit ur idrus ma izrin, ur xf lla’m illi yat. Ur d Rdwan aya? Amddakwl lli ngh g Fransa.
–  F-umggerd iw abla nettan aya. Man sul itamn ad yaghul. Berrk a Rdwan g tigmmi nk,  hati yan n tawja ad tgit. Ad ftugh ad awn d hiyylgh yan ukwas n watay d imikk n lfakit. Tddu, tawid di dis ifcka n watay,  tittin g itsn,  xf ad msawaln mkda ran,  taywa ar thiyyal tugmimt,  Amucc ikelkdn s imzzi, yijnjr d tbakllat is,  yadhu s tuwsadht iga d tissi.
–  Is ak tssent,  Kyyin! As inna Rdwan,  tiwssant g Bariz. Yan mennaw ussan ayad,  ttiwbdart g yan radyu n tmazight. Awr imil mayan ad g igi isnusin amarg ad ackigh. Amssays (animateur) lli nit ssengh, ibbid yan imcdh imdharan g izlan nk xf ugerram. Murran ad iga,  ur n ifl llig idhr g udlis ik. Ini yi is sul ghur ik idlisn yadhnin agi ?
–  Yah,  rad ak ucagh g isn kradh.
Iddu isiggl tn id g yan uzznbil n usghar ikwlaln,  inadhr tn Rdwan immzwi:
–  Timuzunin n tzuri ad gan idlisn ad nk a amddakwl iw! Wid g Bariz,  rad nit imdhara watig nsn. Matta wad ak izzugzn takaligrafit ad izhiln?
–  Yan umhdhar n lmderst. A istan wawssar.
–  Aylli tffugh turda.
–  mkan tgit amdiaz, tskrt amras ik, wahli wahli!aylli tskart ur ili atig.
–  Tanmmirt amddakwl iw, awa adj angh g maya,  rad tn tghrt ixf isyya,  sawl angh xf kra yadhn. Manik ad n tga Fransa?
–  Fransa,  aynna s tfttu ar thrac, tafuda ur ghur is mad tlhu, da tdrugi,  tdyali,  zoma ar tzznza ar tssav g tidrugin,  ad as isaha mad tssa,  tffugh s tukkrdha aman alln, ar tkccadh azal thma g thuna, igurarn n umitru,  itubisn. Igh d yiwi Rbbi kra n ubulis issutc kra-yan, han idh an d iruhn,  rad tgrawl xf imi, ar d tffughn,  jdrn walbnuwatn,  d timubilin,  mmergn ibrgadzn( supermarchés) d thuna, tiwggasn isurthin….Filmin maya, izri iwlafn g tilizritn (télévisions);  aflla-n-wawal, maya ar issiwid ifransisn n tadala tamjahdit, van a xf ar tzatin i ir-fassi (extrême droite). Tafacisit s uklu afransis! Aorab ad ilkm udhad,  a ris tsikin ta viza, igh g is dhrn,  jiyyfn t id, nigh t in qqen g ibenniqn mad ifrgh waddad is. Yan igan min-arra, iga nit min tuzdvt,  yili kra ikka g umdja. Igwyya gurrmnin iga ghur sn ad nghin u tmzgha zun igh sslfn i udmawn isn,  ar ka thdharn igh usin iman is.Nkki ur a yi thadant timukrisin ad;  waxxa izzmaw ghad itgurun.
–  Ilin sul imsadhn iran ad zugn s Fransa! Mta helli ssen is sul ur lin taghamt g tmura n Urubba. Maymi rad tmmalt i uqbban? As irur wawssar.
– Nekk ksigh n i maya zikk,  nkrgh asigh tasmura (nationalité) n Fransa,  lligh sul tkka ludha, gagh anamur yughdn, ittuqarn tinumin(lois) n tnagdudit (République), ur an tcidhghv i kra as ur igin, d nit tuggt n ayt tmazgha ur a tfukkun iskkiln.
– Zund ukan wid illan agi, as inna wawssar.
– Wwi llan gr ayt-dar isn, ur tn izziwz yat.
–  Tghwzant.
Tsnara tn tawssart.
–  Awa tnfl tmazirt s yat twalt,  ad inna Rdwan. Awd agi ar istrar (se modernise).
– Yah,  macc tga ghas tatrarit (modernité) tananayt, ad istan wawssar, tmls s yan ufus n gar ighmi, dghya tnsr, taggwid taghara ighwzan n tghawsiwin. Midden agi ur agh sul ttuqarn yan mad ur igin aqaridh. Yan wass rad yurri wasun d talat ad gan tanzzruft. Mamnk rad icqqu i yan jjun ur itthifn yat,  meqqar d ujrwidh ur xf llas ihyya. Takrrayt tzhrit g Fransa ur t tsaswa d tin ghi,  tingh tga aggwa d ittkfan zgh wafa unck lli sad tthaz ar ttcfal, ghiklli n umzhidir (microbe). Fransa ghur is imassn,  d tzmer ad tsmkilil tins ar d taf afssay,  imikk n tizi n urmmadh takwi t; ackid awa s ghi lligh gudint tasutin xf tasutin n tkrrayt aylligh agh d tlkm amki s t ntannay assa, ar tbzag tssrkuku tasiliwin n wamun.
G wamun ,  assa anbvur ad iskarn kra ira iddu s ghin ira. Tuggt nttat ar n tnjillif ar tbrbur izzi n yan ifri itmlallin. Ayhayya i tmlillay. Nlla d g ir n ifri n waghwzn. Tukin taysi d tmyurin,  inhabber urzki n tawtmt d wazzan,  tifrxin ar tmrdhant,  awd iferxan. Tarwa skubbern izzhi n iqudas. Acku kra skarn ur t ufin. Imanllitn (mentalités) as d iqqan ad nfln.
–  Asnfsi nk innumi , tghwzant igh ur nfln imanllitn amya ur rad iffugh. Ini yi timdyazin nk i ra d ilint g tssfifin,  igh ur yazh,  ur ran yaggug, iwigh ak d ukan yan mnnaw igadjitn. Rad k sfrujjun. Ula atay lli thmlt,  d tabagha st innan d ixf is acku amtaybi n tskwflt izwarn ad tgit,  iqqand ad ak tid ttazngh tawalt ar tayya, rad k issusm urbbij ak d stigh… Ini is sul tthaft aghyyul?
– Uhuy,  ghur i taserdunt,  aghyyul ur a sul iskar ixss imqqurn agi,  walli dari igguran ccan t ihaqqarn ad ak inigh yan kradh isggwasn aya. ghi ad idher umuder n uzagg luhn in taghssa is i tmtci. Tura ghuri yat tsrdunt ihlan,  ar ka tsddiqis,  ur tra amr ad as ikks ckal tngi, macc mkan ur yi d ittagh,  da tghama ttiwqqan g usds.
–  Ndi,  ar tddugh s ugdz yat twalt g imalas, imma tura ar as tkkagh ar kradh iyyirn. Aynna ira yan ar t ittafa g thanut n usun,  ur sul iga uzmz mklli s tin ikka.
–  Aqq is icwa maya., as d istan Rdwan.
Tizi yan sllan i zzaza n uqryan.
–  abbandi lli igan Hmad a igwmrn tiskwrin,  as inna wawssar.
–  Inighi lli a an?
– Yah,  nnigh is ndi ad yi d igwmr kra n tmnsadht i imkli n assa,  iga imiss,  hmlgh t bahra.
Immatti wawssar yaggwin d usrzm, ukan yurrid iggawr
–  Iwigh t id nnican, as inna, nettan a iga, iskerd ghi.
Mrawt tusdadin ad izrin,  llig ad ityasay taggurt s usduqqr. Tawssart ad immattin trzem , llig d turri tzzig d sdhist tskwrin isuddumn s idammn .
Amucc ibbi cala imdi i lal is, lli t ismdurran. Izmr ad as izbu yat n tswkrin sul  ismiqqitn.
–  Hmad ifl ak d xxtid, as tnna tawssart, gigh as iman ad d ikcm yagwi, irwas is dar is ma iskar.
–  mad ghur is illan ad t iskar ! Is ukan yuf is ad ig fvnit,  igiwr n midden; iga ndi amzhlay. Is awn tssenm ad n tbbero s tswkrin ad !
–  Ar tnt ukan cttagh id-hina g Bariz,  macc timgrad. Xtti n assa rad adfutnt.
Hiyyl awa ad tmdhit tadhfi n tmnsadht,  han akkw tin tifyya ur tnt tsaswa, ku tamazirt d tadhfi is, akssum n ghi yadhfut bahra xf win ighrm. Tifrdi ad tn isnuhyu.
Mad ccan yan imkli tn issusmn,  Rdwan isawl i wawssar inna :
–  Ufigh n is yi d iqqan ad ftugh ghila s Agadir. Ur yi sul iga ad miggirgh d umhdhar lli,  awd ur yad lli xf lla’s skrgh . Ad idhfar tagharast is ifawn. Willi da skrgh,  stawhmman athas, ur yi iskr uzmz ad zglgh almuqqar an.
Skkiwsn tanila n sin ikwasn n watay ichhrn,  wis wartalla n watay zgh uzhur n saska .
–  Nekki imil righ ad k amzgh, ad ka ttut imikk n icabukn n idumalin (investisseurs), a istan wawssar ; imma amhdhar ur yad dar k mad as takkat, yuf ad idhfr tabrida ns. Macc i tmssaghin agi ad irar yan anlli is i imxlwadhn.
–  Tnnit i walli ixaldhn ticnba, ssengh akkw maya,  han illa ghid ixf idus ur ad st g is iskr yan. D ma yi bahra n igan,  yat tbhirt n ulugum g uzaghar n Souss lli rad inzn,  d tirawt ad skugh yan luzin n uzzmay n litcin d mad t irwasn … ad ittiwsafadh s brra.
–  Aqq tid dusnin aya,  vas ad trart anlli nk s uqccab nk. Han imakrn llan ghin ka tkkit.
–  Llan akkw g Fransa, gr imsrtan, d kra-igat mani, macc ur jjun kkan gr yi d tiwwuriwin isuddumn urgh.
–  kyyin a issen tawwuri nk. Macc Amrruk walli, mmara rad ak t ibdr.
–  Syya iman ik,  i rad rargh annli mklli ila wawal,  as inna Rdwan.
–  awa tura tshnnat yi,  llig yad tbdrt Agadir ikut manik ad iga tura ?
–  Wahli ! Agadir iga ighrm n imallayn. Ur illi amr ssima xf ssima ! Imndhara nit,  macc nkki taryalt ur rad st g is sdumaligh (investis). Tamallayt tga izmaz, tzdi bahra d taswultit (conjoncture) tasrtant d aylli d itgurun ur t itam yan.
–  Imis bahra imsadn ad iga ?
–  Ghan ad nnigh. Macc tura s kra n imikk ukan.
Immatti,  yasi idlisn lli as ifka wawssar.
–  Awa ar timlilit,  yini Rdwan.
Awssar innukma, immatti awd ntta.
–  Ar timlilit igh ira Rbbi,  ad turrit imal !tngha yi tgudhi ad n tilit g tmurt yadhnin taggugt n did ngh.
Iman d Rdwan ar satimi n tgmmi.
Yudhad yali, yut s usggunfus zun igh d irzm i wagga yutin tadusi is.
–  Trmit ?tsaqsa tawssart.
–  Uhuy,  is gigi ighama. Kramraw n isggwasn ad t lah, hati dagh idda yad, ikut mnckk ar ad n ikk. Dar i zhr tthafgh km kmmin, amucc awd nttan illa agi. A abzaw iw izhiln ! mtad is tzdhart ad tssnt s watig n tiddukla. Macc tgit ghas amucc kyyi. Ur sul ssinagh is zmrgh ad aragh ? Izdhar ; macc ad n srsgh ixf yan imikk kkaghd imikk n iths.
Yaghwd iggi n tgdhift ifsrn g tmshrit,  izbu tin uhaynun.
–  D azzan amqran,  as tnna tawssart i umucc tn d g is issukin min yukz mad tnna.

Fel agh tannayt

Your email address will not be published. Required fields are marked *