Amyawad n y-id

… Ssexsi tifawt ! Tenna iyyi t id gh umezzugh inw tsemed awal nes s imik n tâdêsâ ifssusen ar as ukan ttales teghlaghalt gh imezgan inw, nnigh as ad sul ur talset i tguri nna, hati iggut ma d fellam izrin d tillas ! Is ra d tezzrit tudert nem akw gh tillas n tillas ! Tenna iyyi tillas agh d rêzêmgh allen inw, tillas agh d nekergh. Meqqar d azênzâr n tidt [1] ar t in ssentalen s tallunt, ur ran ad agh d ilkem ! Ran gigh ad ka nesdelfu gh tillas. Nnigh as tillas is agh ssiwident ur nnigh amar gh gizent rêzêmgh allen, ar iyyi d sekwtayent asemdêl.
Astan [2] inw ismudda tt gh yan uswingem idran ur d gis tduy amer lligh as nnigh : azemz ad lli rad didem zrigh a tanirt righ ad tendru gh tifawt, tenna iyyi ur jjun îdîr wawal nek s akal, adwal ad iqqan d ad iyyi tsellat, iqqan d ad texsi tifawt ! Nnigh as maxx têzêrît jjun madd issenwan tiremt igh texsi takat ? Têzêrît jjun mad iccan tiremt nes gh tillas ?! Tenna iyyi madd yiwin tad s tad ? Madd yiwin taguni s tiremt ? Smuddigh gis yat tummenda yussin taggwatin n takunt, nnigh as tirghi as agh kullu neggwant ur tufi yat mani tekka i tayyâd ! Semdegh awal inw nnigh as igh texsi tifawt manik s trit ad zêrgh asufu n twallin nem gh tillas ? A d righ d ad zêrêgh tagziwin [3] lli n fella ssentelnet tmelsiwin nem, righ ad nen gim annigh talâersîn lligh ijgugel rêmman iga ukan igellin taghwiyyit inwa ilàh mad t ittekkisen, had mani gh d ugelen izêrêman n wadîl ar ka sillifen, had targwa had aghbalu had igran nekkin ar ad ten ikerz nessuten igh rufan, negasen tidâf ar kigh nen gizen tefsa taydert nemger t id. Manik s trit ad zêrêgh timitar n ufulki nem igh texsi tifawt ?! Tenna iyyi maxx lligh a helli ttirit ad tezzîghwzînt awal nek ? Meqqar iyyi tennit iwaliwen nenna mmimenin d tguriwin nenna lli inkedên gh tamment iqqan d ad texsi tifawt ! Tsemd iwaliwen nes s yan uzmummeg [4] d issuggan asufu n tuxsin nes mellulenin…
Ssexsigh tifawt, rêzêmgh tifelwin n usatem, tegid tmayyurt idârên nes ar darengh. Skergh nit atanirt s wawal nem iggal am wayyur ur sar ittâr wawal inw s akal ismuttel agh sul nikki dim gh tifawin nes !!
Yîd anen n unebdu [5] wizûgen [6] k ad îrzân ifessi [7] lligh innudâ, idru didengh iwiz s yan mamek ! Ar aghd ilkkem uzâwan nes gh tmaggugt. Yat gh gis semmuddigh asemmaqqel, yat gh t giti tsemmudda ig uzmummeg areqqas ger wulawen. Necabbaken idûdân nedder nen gh ilallen [8] n twargiwin d tnuflayt [9] ur ilin ttemi, ayyur k ad agh issuggan.
Mmaqqarent tanfurin mmeckelen walsiwen ilàh agh s sin ! Nemmudda nenghubu gh ubrid n tayri, nelluzza gh teswak n tghufi. Mar ad agh igru ! Mar ad agh ignu ! Mar ad agh ismun ! Mar ad agh d irar ad neg mekelli y adelli nega ! Manik ad temmimet atayri ! Manik ad adêfuten wadân nem !
Azemz ann ttugh mad righ, ttugh mad gigh, ttugh man adghar gh lligh, righ ad ddergh akud anen s kra giti illan usyafa [10] idran d tufrayt nen bahra idran, righ ad yighzif uzemz anen ad ur isemd, akud anen ka d tessengh tadêfi n tudert d umareg n tayri, d watig n kera yâden ur t akw ssengh !!
Nnigh as yak ur kem tegwrâz atanirt lligh sul fellagh tergha tifawt ? Tenna iyyi tessent a ziri manik ad dari tegit. Tessent is rad iyyi ur tigwrîz gh kra dik zzrigh ula kra rad dik skergh. Acku ikennu n iman inw d mummu n tîtt inw ad tegit. Tenna iyyi tawtemt ur jjun d nettat ad iran tillas, is t helli gis gan teg tamyuret issekraf i twargiwin nes, tawtemt ur agh ttafi agayyu nes amer gh tifawt, is ka temmra [11] tittît n tamyurt acku ar ttinin willi zerinin – kkes meyur ad iceqqan ur d meyur- tsemed awal nes tenna iyyi iqqan d ad tebbi tewtemt isskraf n tillas tedru tiderfit d urgaz, iqqan d ad tamêz afus urgaz gin yan gh ubrid n telelli [12], tenna d tiguriwin ad s yat terêzêgi n akw ur intilen. Nnigh as teghwzânt atanirt iqqand i tuwtemt ad tssukwf tigusin n tedallit temmagh ad teg agayyu nes, ad sul ur teg amer agayyu nes. Ad asen ghas ur teg ghikelli giz ran ad t teg !
Teqqen tiwallin nes terêzêm tent tezmummeg yan uzmummeg mu ur intill w ammak nes, hèllilgh t sellfegh i temggêrt nes sellfegh i tghallin nes, idmaren nes agh a iyyi yakka wafa i wayyâd. Jelligh idûdân gh wazbalen n ugayyu nes, azzar nes ingi helli zun d imuzzar…
Mmeckeln idârên d tedârîn, mmeckelen nen walsiwen gh jaj [13] n imawen, ikcem kra gh kra nejlu gh ubrid ar nefttu ar d nettadû aylligh nellil s tidi, imik s igh n tebbaqqa tendra gh igenna…
Maxx lligh ad ur temunt a tanedra n tezâga d imettâwen n tumert [14] ?!
Mohamed Oudmine Ziri

Amawal

Tidt : vérité.
Astan : réponse.
Tagziwin : ufuren, ayelli n ihêdân, secrets.
Azmummeg : sourire.
Anebdu : l’été.
Wizûgen : la cigale.
Ifessi : le calme.
Ilallen : yan nes ill, igirw, la mer.
Tanuflayt : bonheur.
Asyafa : tufrayt, sentiment.
Temmra : tceqqa, (il est difficile).
Tilelli : tiderfit, liberté.
Jaj : agwens, (à l’intérieur).
Tumert : la joie.

  1. ayyuz igmatngh lli izdarn gh tallastad a dagh dits ismuddu gh yan ill n isyafatn ncukku dids asaru n iskkirn ar taguri lli igran awa hati asnflul ghmkad ad itgga w alligh izdar gmatngh udmin ad ismussu tiguriwin imlagh masd tutlaytgh tzdar ad agh tfk tiwlafin zilnin f tudrt n ufgan d uswir n tayri immimn tiklit yadn ar ttinigh igmatngh igh tzdart ad tcukkut agharas ad gh tskla n tallasin zdargh adak inigh masd imal nk rad ibughlu d zdargh adak inigh mas ira atgt yan gh imaratn n tallasin ganin imqran gh w amur ula htta amadal.

  2. Tannayt yuman Arttinigh iyaytmatn imazighn Aylli ifawn is ur tassin tamimt n Tghri s Tmazight sllawan ak tin Tallasin ula tin Tmdyazin mac imik s imik ir asul nlkm awttas sllawan ak lligh nttaf zund anawn ad n imaratn gh Tskla n tallast ula Timdyazin Tarnnawt iyaytmatn Aflla ituwri nnun.

Fel agh tannayt

Your email address will not be published. Required fields are marked *