Tamazight d nkkwni

Ay lli mu nzdar ur a t-nskar
Ismummuyen n Imazighn, willi g isn ferknin, ar bahra fttun s tawunkt af ad ad dis zdin aghbalu n imukrisn n tmazight. Mcucckigh d isn, macc is ur nzdar ad nini masd Imazighn s ixfawen-nsn, willi immaghn f tmazight, inin gan imghnasn, ur ar skaren aylli mmu kullu zdarn. Aylli gh ur sghawsan s tawwunkt. Ur sghawsan amr s tayri-nsn ad skrn. Macc ur a t-skaren. Ma-yad rad t-ssisfiwgh gh mad yuckan.

1- Ad nsawal tamazight :

Imazighen, gh umzruy nsn ggutn, sselkem-agh-d tamazight, acku ar tt-sawalen. Ur ar tt-ttaran, tirra dars-n zdint d tutlayin yadn, macc awal ur ar ittili amr s tmazight. Hiyya ad nsawal s tmazight, iga imiss ma s ar nssidir awal-ngh. Is ar sawalen imghnasn Imazighen tamazight d tarwa-nsn ? llan willi tt-sawalnin, macc llan wiyyad, gh gan inmghuren n umussu adlasan amazigh, s lawant akw willi illan g tmdinin mqqurnin, awal amazigh immut g tgwmma-nsn. Mmaghen fell-as, s tidt, macc g berra n tgmmi. g ugns, taarabt ad sawalen, d igh darsn imik n idrimen, ar issaqra tarwa-ns g tinmal n tutlayin n berra, han tafransist akw, ad illan g tgmmi. Ad nsawal tamazight g tgwmma-ngh, d kraygat mani, ur isghawsa tawunkt, ur izdi amr d tayri-ngh.

2- Ad nttara ar naqqra s tmazight :

Ssengh is ur ilmd ad ittara yan, macc ur igi taghawsa ur ittuyskaren. Tirra zud akw tighawsiwin ur gint amr tamyurt. Izdar umussu amazigh ad ikf talalit i yan mnnaw imaraten, mqqar drusen, macc ar ttiguten imik s imik. Macc igh ur zdaren imghnasn akw ad ttaran, is ar aqran aylli ityaran s tmazight ?. Is ar ttmaghn ad skren ay lli ttsuturen i tawunkt ?

3-Tifinnagh g ighwrban :

Ran akw Imazighen ad zerran Tifinnagh g ku mani, macc willi g isn ttafnin imahalen (tihuna), d imarisn ur zdaren ad aran s tfinnagh g ighrban-nsn. Iktar umussu amazigh s imastann (avocats), idbibn, d wiyyad, mnnaw g isn ad yuran s tifinnagh g iggi n lmahalat-nsn ?

4- Assaghn n tmazight :

Assagh, ur igi amr yat tguri ma s ar taqrat i ufgan, iga tamagit. Ad yasi yan assagh amazigh, ar as yakka tamagit-ns, ar tt-issidir, ar tt-ittssn ku yan. Igh tstit assagh amazigh i warraw nk, ur d ghir tawunkt a rad ig afna nk, rad zwar tmmaght d ayt tgmmi, tamghart-nk, ma-k, baba-k, tawja yakw. Llan imghnasn imazighn lli izdarn ad nrun akw imukrisn ad stin assagh amazigh i tarwa-nsn, macc gguten willi-yas ur zdarnin. Willi mu irxa ad immagh d tawunkt, f ad isti assagh amazigh i y-iwi-s nghd illi-s.

5-Taghnsa gh ugns n tgmmi :

Imghnasn n tmazight, gh gan inmghuren-ns nit, ur ar ssiwisn ayt tgmmi nsn gh tghnsa n tmazight. Tarwa n imghnasn, ur ar ttissanen mad iskar babatsn gh tmazight, ur dfaren amussu amazigh, tili turda is llan d isuteren n Imazighn. Tga tghnsa f tmazight zund yat twuri ar tt-iskar urgaz (baba-s, gwma-s, nghd iwi-s) gh berra. Tella turda i sar fell-as isawal gh ugns n tgmmi. Igh ur nzdar ad nssiws ayt mat-ngh, ist mat-ngh, id babat-ngh, ist immat-ngh, timgharin-ngh, tarwa-ngh d wadjaren-ngh … gh aylli nsala, ur ad nizdir ad nsbzziz f tawunkt ad tkf izrfan i tmazight.

6- Taghnsa g berra n tmazirt :

Tamaght f tmazight tkfa yat tghlaghalt mqquren zegh alligh ar fell-as sawalen Imazighen g inmuqqaren n berra (ONU). Macc, tigira-yad, yurri umuddu s berra iga awttas, netta nit s ixf-ns. Tili tamaght f ma rad ifttu d ma rad ur ifttu. Urrin imghnasn ar nn-ttittin f tghnsa g ugns n tmazirt ar tellin s tin berra uggar n ugns. Taz-d Genève d New York f Imazighn n Sidi Ifni, Tunfit, nghd ad nili tama n imhdaren imazighn lli itbddaden tama n lbarlaman.

Ma-yad, gan ghir kra n tghawsiwin, ad g isnt akw nswingm, igh nra ad naws gh ubughlu n imal n tmazight acku amija (danger) illa igh agh tella twkka g tisnt.

  1. ayyuz gmano kolo mayad li tnnit illa dmnaw asrs itwargan mach nnorz ang afos gh ofos imazighn ola timazighin afad adig mayad stnit tillawt awr ig ghar tawwargit tamazight tsghawsa sitgh ghmkli srs nsghawsa
    tanmirt nk attas

  2. tanmirt nk gmatengh anir f umagrad nk ghiklik snimiragh f sit ad lyagh tmlit istawhmman s imazighen tg ola almoqqar n imazighen li youssin si3r n tmazighte innagh llan . tanmirt iflojjan i kollo maghid ittaran .

Fel agh tannayt

Your email address will not be published. Required fields are marked *