Akal amazigh d tutlayt

Mohamed Akunad


Afulay


Saint Augustin


Ibn Xaldun

Ggutn willi ittinin: Imiriwn ngh (nos ancêtres) g zik ur fkin atig axatar i tutlayt nsn, ujjan tutlayin yadn nbdnt mk lli tnbd tutlayt nsn nttni ngh ak uggar g iggi n wakal n tmazgha, usin tnt, aran sisnt, gn g inmghurn g tussna tamadlant ur tn ittu uzmz, zund « Afulay, Apulée » d «Saint Augustin», d iwis n Xldun d wiyad lli d ifln idlisn ilan atig axatar mac ttyaran s tlatinit ngh ta?rabt.

Mac akal amazigh iga bdda agrram dar imiriwn ngh, gan inn fllas idammn nsn, mmaghn d imsdurriyn (colonisateurs) dusnin rzn tn, ssufghn tn g tmura n tmazgha, llan gisn willi kkanin tasutin allig ghaln is tga tmurt tinsn, g tgira ffghn sul, zund Irumiyn lli izzirn nnig 600 n usggas g izlmd n Tfriqt ffghn sul g tgira.
Llig hra d udfn I?rabn s tmazgha nbdn kra n imik g tmura n tmazgha, mac ur jjun asn tsiya tizi, ur jjun syafan s ufra, allig sul ttrzan g tgira, nbdn ilmmaimazighn ixfawn nsn skun awank sisn izlin, ur llin ddaw n usdurri n inbbadn n Baghdad, mac ur fln Tamuslmt.
Tzdi asn Tmuslmt lli igan asghan (religion) d tutlayt n I?rabn, mac nttni lli mmi nxabblnt tghawsiwin, ulln atig i ta?rabt, rarn tinsn xf usga, ur ssn is d ass lli skrn aya nn ad gan agri i ku ay d igan winsn, tayafut lli ifka uskkir ann ar tt ukan sul yakka iga tt: Ur d is ka idda aylli xf yadlli mmaghn gn inn fllas idammn d idrimn, is nn llan xf umija (danger) nttni s ixfawn nsn, amija n ad nghubun lah tn; ass ad idrus man akud tn d islay wawal g tmura lli tt inn ikkan gant tinsn, acku ass ad llant turda ggutnin ur d is gant tinsn, llant turda is sul llan nttni nit g uzmz ad, d igh llan, is ur gin ghas afulklur lli mmaln inbbadn lli mmi llan g ifassn nsn i imallayn g ku mani, ar asn ttinin: Wi d gan kra lli d ighaman g Ibarbarn lli tt inn kkanin g zik g tmizar ad!
Akal lli tt inn ikkan iga dar imazighn agrram, ass ad yaz awd ntta ad asn iffgh afus, llig d udfn irumiyn, kksn asn taganin lli igan tinsn dfurn tn d ighbula n waman, imik s tmaxirin n ddaw n wakal, zund urgh d uzrf…
Aqryan as ffghn Irumiyn (Ifransiwn d Isppunya) g tmura n imazighn, amzn fllasn tarwa n willi tn d yadlli isskcmn s tmurt, ighama bdda aylli ittuwkkasn i tqbilin timazighin ittuwkkas, uggar n mk ann, willi kkusanin Irumiyn, mmaghn ad kksn snfln mqar d ismawn n wakal amazigh: Tamdint lli tt inn ikkan ttuwssan s Mazagan, turri tga “ljadida”, Mugadur turri tga “issawira”, Agni i imgharn yufa d ixf ns iga “fajj” i imgharn, tamazirt ak lli tt inn ikkan ttuwssan s Mrrakc turri tg “lmaghrib al aqsa”; ur sul tlli g wamur amazigh, tlla g “lmaghrib n i?rabn” …
Ass ad ar tnzza tmurt n imazighn s igzman i ayt iminig (orient) s idularn n ppitrul, aghuln taganin ar nzzant, urrin iftasn lli ganin win middn ar ttuwqann xf ayt tmazirt, gn ayda n wayyawn n tarwa n Mayya, ar skarn tighrmin skrn ismgan gn tayyawin n Massinissa d twiwin!
Ur tbidd twaghit g di nn, addur ar ittrzza, tarwa tnnukma fllasn tmurt, ttfkn i ilaln ad tn bbin awr imil njmn i yan undal illa g brra d ugns.
Igh ur idl yan s tmagit ns, hat ijla indl g jaj ns, mqqar ila aydatn d waydatn ur tkksn g tmmara n iman.
Atrs (peut-être), tammara ad rad d tssfrk imazighn ad ssnn is d igh tjlit tutlayt ha nn tjlit ku taghawsa, awd kiy tjlit, da ttinin imzwura: Tiyti nna yi ur inghin, da yi tsslmad. Is rad nlmd nkkni imazighn yan wass g tiytiwin lli agh bdda ikkatn?!
Agadir ass n 05-03-2009